އެމެރިކާ ފުލުހުންނާ ކުރިމަތިލާނެގޮތް ފަލަސްތީނު އެކްޓިވިސްޓުން ކިޔައިދެނީ

އެމެރިކާގެ ފާގަސަންގައި ކުރަމުން އަންނަ ހަޅުތާލުގެ ބައިވެރިންނަށް ފުލުހުންގެ އަނިޔާވެރިކަމުން ސަލާމަތްވާނެގޮތް ޣައްޒާ ރައްޔިތުން ކިޔައިދޭން ފަށައިފިއެވެ.

ފާގަސަންގައި ހަޅުތާލުކުރާ މީހުންނަށް ނަސޭހަތްތެރިވުމުގެ ގޮތުން އިޒްރޭލު ފުލުހުންނާއި ދެކޮޅަށް ހަރަކާތްތެރިވާ ފަލަސްތީނުގެ އެކްޓިވިސްޓުން އެމީހުންނަށް ނަސޭހަތްތެރިވަމުން އަންނަނީ  ޓްވީޓަރ މެދުވެރިކޮށެވެ. އެގޮތުން އެމީހުން ވަނީ ކަރުނަގޭހުން ސަލާމަތްވުމަށް އެޅިދާނެ ފިޔަވަޅުތައް ކިޔައިދީފައިވެއެވެ. 

މަރިޔަމް އަލް ބަރްގޫތީ ކިޔާ ޣައްޒާ ރައްޔިތެއް ކޮށްފައިވާ ޓުވީޓެއްގައި ބުނެފައިވަނީ "ކަރުނަގޭސް ޖެހުމުން މޫނުގައި އަތްއުނގުޅާ ފެން ހާކައި ނުހުދާތި. އޭގެ ބަދަލުގައި ކިރު ނުވަ ކޯކުން މޫނު ދޮވެލާ،" އޭނާ ކޮށްފައިވާ އެހެން ޓުވީޓެއްގައި ބުނެފައިވަނީ "ކަރުނަގޭސް ޖެހުމުން ވަޔާ ދެކޮޅަށް ދުވޭ. ކަރުނަ ގޭސް ޖެހުމުން ހާސްނުވާތި. ތަދު ފިލައިގެން ދާނެ. ލޮލުގައި އަތްނޫގުޅާތި،" ކަމަށެވެ. 

ރަޖީބް ހަލީލް ކިޔާ މީހަކު ބުނެފައިވަނީ "ފުލުހުންނާއި ވީހާވެސް ކައިރީގައި ތިބުމަށް މަސައްކަތްކުރޭ. އޭރުން އެމީހުންނަށް ކަރުނަގޭސް ބޭނުންކުރަން ދަތިވާނެ. މިއީ ފަލަސްތީނުގެ ފަރާތުން ފާގަސަންގެ ރައްޔިތުންނަށް ދިން ނަސޭހަތެއް،" ކަމަށެވެ.

ފަލަސްތީނު ރައްޔިތުން ދަނީ ސޯޝަލް މީޑިއާގައި އެމީހުންގެ ޝުއޫރު ފާޅުކޮށް ފޮޓޯތައް ވެސް ރޯލުކުރަމުންނެވެ. އެގޮތުން ފަލަސްތީނު ރައްޔިތަކު ހިފަހައްޓައިގެން ހުރި ޕޯސްޓަރެއްގައި ބުނެފައިވަނީ "ތިބާ ނިސްބަތްވާ ނަސްލެއްގެ ސަބަބުން ހަތިޔާރެއް އަތުގައިނެތި ފުލުހުން ތިމާ ގަޔަށް ބަޑިޖެހުމުން ވާ އިހުސާސް އަހަރުމެން ދަންނަން،" ކަމަށެވެ. 

ކަޅު ނަސްލުގެ މީހަކު އެމެރިކާ ސިފައިން މަރާލުމާއި ގުޅިގެން ފާގަ ސަންގައި ކުރިއަށްދާ ހަޅުތާލުގައި އެމެރިކާ ފުލުހުންގެ އަނިޔާވެރިކަން ހައްދުފަހަނަ އަޅައިގޮސްފައިވާކަމަށް ހުޅަނގު ނޫސްތަކުން އަންނަނީ ބުނަމުންނެވެ. 

މުޒާހަރާ ކޮންޓްރޯލު ކުރުމަށް ފުލުހުން އަންނަނީ ލައިވް ވަޒަނާއި ކަރުނަ ގޭސް ބޭނުންކުރަމުންނެވެ. މުޒާހަރާ ކުރަމުން ދާ ސަރަހައްދުން މަރުވެފައިވާ ބަަޔަކު ފުލުހުން ގެންގޮސްފައިވާކަމަށް "ނިއުސް ވީކް ޑޮޓް ކޮމް" އިން ބުނެއެވެ. އެއީ ކާރު އެކްސިޑެންޓެއްގައި މަރުވި ބައެއްކަމަށް ފުލުހުން ބުނެއެވެ. އެހެންނަމަވެސް ހަޅުތާލުގެ ބައިވެރިންގެ ތެރެއަށް ފުލުހުން ލައިވް ވަޒަން ބޭނުންކޮށްގެން ބަޑި ޖަހާފައިވާކަމުގެ މައުލޫމާތު ލިބިފައިވާ ކަމަށްވެސް އެ ނޫހުން ބުނެއެވެ.