އީރާނުގެ އެތެރޭގެ އުދުހުންތަކުގައި ބޭނުންކުރާ ބޯޓެއް ވެެއްޓިއްޖެ

ތެހެރާން، އިރާން: އީރާނުގެ ވެރިރަށް ތެހެރާނާ ކައިރިން ފަސިންޖަރުން އުފުލާ މަތިންދާ ބޯޓެއް މިއަދު ވެއްޓިއްޖެއެވެ. އިރާނުގެ ޤައުމީ ޓީވީން ބުނާގޮތުން ފަސިންޖަރުން އުފުލާ މަތިންދާ ބޯޓް ވެއްޓިފައިވަނީ ވެރިރަށް ތެހެރާނުގެ މެހެރު އާބާދުގެ މީހުން ދިރިއުޅޭ ސަރަޙައްދަށެވެ.

އިރާނުގެ ޤައުމީ ޓީވީން ބުނާގޮތުން ތަބާން މަތިންދާބޯޓް ވެއްޓިފައިވަނީ ތެހެރާނުގެ ހުޅަނގުގައި އޮންނަ އެއަރޕޯޓަކުން ފުރައިގެން އުދުހިގަތްވަގުތުއެވެ. މި ބޯޓުން ދަތުރުކުރި 40 ފަސިންޖަރުން މަރުވެފައިވާކަމުގެ ބިރު ހީވާކަމަށް ޤައުމީ ޓީވީން ބުނެއެވެ.

އިރާން 141 ގެ ނަމުން ނަންދީފައިވާ މި ބޯޓަކީ އެތެރޭގެ އުދުހުންތަކަށް ބޭނުންކުރަމުން އަންނަ ބޯޓެކެވެ. މި ބޯޓަކީ ޔޫކުރެއިންގެ ޓެކްނޮލޮޖީ ބޭނުން ކޮށްގެން އިރާނުގައި އުފައްދާފައިވާ ފަސިންޖަރުން އުފުލާ ބޯޓެކެވެ.

"މިވަގުތު ލިބެމުންދާ މަޢުލޫމާތުން އެނގެނީ ބޯޓުން ދަތުރުކުރި 40 މީހުން މަރުވެފައިވާކަމަށް، އޭގެ ތެރޭގައި 7 ކުޑަކުދިންވެސް ހިމެނޭ." އިރާނުގެ ޤައުމީ ޓީވީ –އައިއާރްއެންއޭ އިން ރިޕޯޓްކުރެއެވެ.

މަތިންދާ ބޯޓު ވެއްޓުމުގެ ޙާދިސާތައް އިރާނުގައި ވަރަށް ގިނައިން ހިނގަމުންދެއެވެ. މިކަމުގެ މައިގަނޑު ސަބަބެއްކަމަށް ކަމާބެހޭ ގިނަފަރާތްތަކުން ބުނަމުންދަނީ ގިނަދުވެސްވެފައި ބޯޓް ބޭނުންކުރުމާއި މެއިންޓެނެންސް މަސައްކަތުގެ ފެންވަރު ދަށްވުމުން ކަމަށެވެ. އިރާނުގެ އެއަރ ފްލީޓްގައި ބޭނުންކުރަމުން އަންނަ ބޯއިން މަރުކާގެ ގިނަ ބޯޓްތައް ގަނެފައިވަނީ އެޤައުމަށް 1979 ގައި ގެނެވުނު އިސްލާމީ އިންޤިލާބުގެވެސް ކުރިންނެވެ.