އިޒްރޭލާއި ދެކޮޅަށް މުޒާހަރާކުރި ހާކަށްވުރެ ގިނަ މީހުން ހައްޔަރުކޮށްފި
5 އޯގަސްޓް 2014 22:42
އިޒްރޭލުން ޣައްޒާއަށް ހަމަލާދިނުމާއި ދެކޮޅަށް މުޒާހަރާ ކުރި މީހަކު އިޒްރޭލު ފުލުހުން ހައްޔަރުކުރަނީ: ފޮޓޯ އަލްޖަޒީރާ
ހުސްވި ޖުލައި މަހުގައި އިޒްރޭލުން ފަލަސްތީނަށް ހަމަލާ ދޭން ފެށިފަހުން އިޒްރޭލުގައި އެކަމާއި ދެކޮޅަށް މުޒާހަރާކުރި މީހުންގެ ތެރެއިން ހާހަކަށްވުރެ ގިނަ މީހުން އިޒްރޭލުން ހައްޔަރުކޮށްފައިވާކަމަށް "އަލް ޖަޒީރާ" ނޫހުން ބުނެފިއެވެ.
ހައްޔަރު ކޮށްފައިވާ މީހުންގެ ގާނޫނީ ވަކީލުންނާއި ހަވާލާދީ އެ ނޫހުން ބުނެފައިވަނީ ބަންދުގައި ބަހައްޓާފައި ތިބި ގިނަ މީހުންގެ މައްޗަށް ކުރެވޭ ތުހުމަތުތަކަކީ ކޮބައިކަމެއް ސާފުކޮށްދީފައިނުވާކަމަށެވެ. އަދި ބައެއް މީހުންނަށް ސިއްހީ ފަރުވާ ބޭނުންވާ މިންވަރަށް އަނިޔާކޮށްފައިވާ ކަމަށެވެ.
ގާނޫނީ ވަކީލެއް ކަމަށްވާ މައިސާ އަރުޝިދު "އަލް ޖަޒީރާ" ނޫހަށް މައުލޫމާދު ދެއްވަމުން ވިދާޅުވެފައިވަނީ އިޒްރޭލުން ހިފާފައިވާ ސަރަހައްދުތަކުގައި ދިރިއުޅޭ ފަލަސްތީނު މީހުންގެ ތެރެއިން ދިހަ ބާރަވަރަކަށް މީހުން ކޮންމެ ހަފްތާއަކުވެސް އިޒްރޭލުން ހައްޔަރުކުރަމުން އަންނަކަމަށެވެ.
"އެމީހުން ހައްޔަރު ކުރަމުން ދަނީ ގާނޫނާ ހިލާފު އެއްވުންތަކުގައި ބައިވެރިވިކަމަށް ބުނެ. ކޯޓު ތަކުން ގެންދަނީ އެމީހުންގެ އަޑު އެހުން ލަސްކުރަމުން. ބައެއް މީހުން ބަންދަށް ނުވަ ދުވަސް ވެފައިވާއިރު އެމީހުން ހައްޔަރުކުރީ ކީވެކަމެއް ވެސް ސާފުކޮށްދީފައެއް ނުވޭ،" މައިސާ ވިދާޅުވިއެވެ.
ކިޔުންތެރިންގެ ހިޔާލު