ޣައްޒާގެ ޔުނިވާސިޓީއަކަށް އިޒްރޭލުން ހަމަލާދީފި
2 އޯގަސްޓް 2014 17:47
ޣައްޒާގެ އިސްލާމިކް ޔުނިވާސިޓީއަށް އިޒްރޭލުން ހަމަލާދީ އެ ޔުނިވާސިޓީގެ ބޮޑުބައެއް ގޮވައިލައިފިއެވެ.
މި ހަމަލާގައި އެއްވެސް މީހަކު މަރެއް ނުވެއެވެ. ހަމަލާއަށްފަހު އެ ސަރަހައްދު ސިފަކޮށްދެމުން "އަލްޖަޒީރާ" އިން ބުނެފައިވަނީ ޔުނިވާސިޓީގެ ބޮޑުބައެއް ގޮވާފައިވާކަމަށެވެ. މުޅި ސަރަހައްދުގައި ވަނީ ފުޅިތޮއްޓާއި ކިޔަވާ ކުދިންގެ ފޮތްތަކުގެ ގަނޑުތައްކަމަށް ވެސް އެ ނޫހުންބުނެއެވެ.
"އަލް ޖަޒީރާއިން" ބުނީ މިއަދު ހެނދުނު ދިން ހަމަލާގައި އެ ޔުނިވާސިޓީއަށް ކިޔަވަންދާ އެތައް ހާސް ދަރިވަރުންނެއްގެ ނޯޓު ފޮތްތަކުގެ ގަނޑުތައް މުޅި ސަރަހައްދަށް ބުރައިގެން ގޮސްފައިވާކަަމަށެވެ. އިޒްރޭލުން އެ ޔުނިވާސިޓީއަށް ހަމަލާދިނީ ކޮން ސަބަބަކާ ހުރެކަމެއް ސާފުނުވާކަމަށް އެ ނޫހުން ބުނެއެވެ.
ހުކުރު ދުވަހުގެ ހެނދުނު އިޒްރޭލާއި ހަމާސްގެ ހަނގުރާމަ, ތިން ދުވަހަށް މެދުކަނޑައިލިއެވެ. އެ ދުވަހު ހަމަލާތައް މެދުކަނޑާލާފައި ވަނީ އެމެރިކާއާއި އދ ގެ ހުށަހެޅުމަކަށެވެ. އެހެން ނަމަވެސް ހަމަލާތައް މެދުކަނޑައިލިތާ މާގިނަ އިރުތަކެއް ނުވަނީސް އިޒްރޭލުން ވަނީ އެއްބަސް ވުން އުވާލައި އަލުން ހަމަލާތައް ފަށައިފައެވެ. އިޒްރޭލުން ބުނީ އެމީހުން ހަމަލާތައް އަލުން ފެށީ ހަމާސްއިން އިޒްރޭލުގެ ހަނގުރާމަވެރިއެއް ރަހީނުކުރުމުން ކަމަށެވެ.
މި މައްސަލައިގައި އެމެރިކާގެ ރައީސް ބަރަކް އޮބާމާއާއި އދ ގެ ސެކެރެޓަރީ ޖެނެރަލް ބަންކީ މޫން ވެސް ވަނީ އިޒްރޭލުގެ ހަނގުރާމަވެރިއާ މިނިވަން ކުރުމަށް ހަމާސް އަށް ގޮވާލައްވައިފައެވެ. ނަމަވެސް ހަމާސްއިން ބުނީ އިޒްރޭލުގެ ހަނގުރާމަވެރިއާ އެމީހުން ރަހީނު ނުކުރާކަމަށެވެ. އިޒުރޭލުން ދިން ހަމަލާއެއްގައި އޭނާ މަރުވެފައިވާ ކަމަށް ބެލެވޭ ކަމަށް ހަމާސްއިންވަނީ ބުނެފައެވެ.
ކިޔުންތެރިންގެ ހިޔާލު