ތިން ދުވަހަށް ހަނގުރާމަ ހުއްޓާލުމަށް އިޒްރޭލާއި ހަމާސްއިން އެއްބަސް ވެއްޖެ

ތިން ދުވަހަށް ހަނގުރާމަ ހުއްޓާލުމަށް އިޒްރޭލާއި ހަމާސްއިން އެއްބަސް ވެއްޖެއެވެ.

ހަނގުރާމަ މެދުކަނޑައިލުމަށް ދެ ފަރާތުން އެއްބަސްވެފައިވަނީ އދ އާއި އެމެރިކާގެ ހުށަހެޅުމަކަށެވެ. ހަނގުރާމަ މެދުކަނޑާލިކަން މިއަދު ހެނދުނު އިއުލާނު ކުރައްވާފައިވަނީ އެމެރިކާގެ ސެކެރެޓަރީ އޮފް ސްޓޭޓް ޖޯން ކެރީއެވެ. 

ހަނގުރާމަ މެދު ކަނޑާލުމާއެކު އިޒްރޭލުން ދެމުން ގެންދިޔަ ބޮމުގެ ހަމަލާތައް މެދުކެނޑި ޣައްޒާ ތެރެގައި ހަމަހިމޭންކަން ވެރިވެފައިވާކަމަށް "އަލް ޖަޒީރާއިން" ބުނެއެވެ. 

ހަނގުރާމަ ހުއްޓާލުމަށް ދެ ފަރާތުން އެއްބަސް ވެފައިވަނީ ޖީއެމްޓީ ގަޑިން ހެނދުނު 8:00 އިން ފެށިގެން 72 ގަޑީރަށެވެ. އެހެން ނަމަވެސް އޭގެ ތިން ގަޑީރު ފަހުން ވެސް އިޒްރޭލުން ވަނީ ފަލަސްތީނުގެ ފަސް މީހަކު މަރާލައި، 20 މީހުން ޒަހަމްކޮށްލައިފައެވެ. ނަމަވެސް ރައްދުގައި ހަމާސްއިން ހަމަލާދީފައެއް ނުވެއެވެ.

ހަނގުރާމަ މެދު ކަނޑާލުމަށް ދެ ފަރާތުން އެއްބަސް ވުމުގެ ކުރިން އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ވަނީ ހަނގުރާމަ ހުއްޓައިނުލައްވާނެކަމަށް ބުނެ ސުލްހައިގެ ވާހަކަތަކަށް ހުރަސް އަޅުއްވައިފައެވެ. އޭނާ ވިދާޅުވެފައިވަނީ އިޒްރޭލުން ފަށާފައިވާ އޮޕަރޭޝަނަށް ހުރަސް އޭޅޭފަދަ ކަމެއް އެގައުމުން ނުކުރާނެކަމަށެވެ.

އިޒްރޭލުން ޣައްޒާއަށް ހަމަލާ ދޭން ފެށިފަހުން މިހާތަނަށް ވަނީ ފަލަސްތީނުގެ 1459 މީހުން މަރާލައިފައެވެ. އޭގެ ތެރޭގައި ގިނައިން ހިމެނެނީ ކުޑަކުދިންނާއި އަންހެނުންނާއި، އާންމު ރައްޔިތުންނެވެ. ރައްދުގައި ހަމާސް އިން ދީފައިވާ ހަމަލާތަކުގައި އިޒްރޭލުގެ 60 ސިފައިން ވަނީ މަރުވެފައެެވެ.