އެމެރިކާއިން އިޒްރޭލަށް ހަތިޔާރު ފޯރުކޮށްދެނީ

އެމެރިކާއިން އިޒްރޭލަށް ހަތިޔާރު ފޯރުކޮށްދިނުމަށް އެއްބަސް ވެފައިވާކަމަށް އެމެރިކާގެ ދިފާއީ ވުޒާރާ ޕެންޓަގަނުން ހާމަކޮށްފިއެވެ.

"އަލް ޖަޒީރާއަށް" މައުލޫމާތު ދެއްވަމުން ޕެންޓަގަންގެ ތަރުޖަމާނު ޖޯން ކިބްރީ ވިދާޅުވެފައިވަނީ އެމެރިކާއިން އިޒްރޭލަށް އަތު ބޮމާއި، މޯޓަރު ބަޑީގެ އުންޑަ ފޯރުކޮށްދިނުމަށް އެބަސްވެފައިވާކަމަށެވެ. އޭނާ ވިދާޅުވެފައިވަނީ އެ ތަކެއްޗަކީ ގެރެންޓީ ހަމަވުމުން ހުރިހާ ގައުމުތަކެއްގެ ސަރުކާރުން ވެސް އަލުން އައުކުރާ  ތަކެތި ކަމަށެވެ. އޭނާ ވިދާޅުވީ އިޒްރޭލަށް އެމެރިކާއިން ހަތިޔާރު ފޯޜުކޮށްދެމުން އަންނަނީ އެމެރިކާ ސިފައިން ވެފައިވާ އެއްބަސްވުމުގެ ދަށުން ކުއްލި ހާލަތެއްގައި ބޭނުން ކުރާ ހަތިޔާރު އެކަނި ކަމަށެވެ. 

އެހެން ނަމަވެސް އަލް ޖަޒީރާއިން ބުނެފައިވަނީ އިޒްރޭލުން މީގެ 10 ދުވަސް ކުރިން ހަތިޔާރު ސަޕްލައިކޮށްދިނުމަށް އެމެރިކާގައި އެދިފައިވަނީ ކުއްލި ހާލަތެއް މެދުވެރިވެގެން ނޫންކަން އެމެރިކާގެ ދިފާއީ ވުޒާރާގެ އިސްވެރިއެއް ޔަގީންކޮށްދެއްވާފައިވާކަމަށެވެ.

 އެމެރިކާގެ ކޮންގްރެސްގެ ބައެއް މެމްބަރުން އިޒްރޭލުގުެ މިސައިލުން ދިފާއުވުމުގެ ނިޒާމު އިތުރަށް ހަރުދަނާކުރުމަށް އެތައް މިލިއަން ޑޮލަރެއް ދިނުމަށް މަސައްކަތް ކުރަމުން އަންނަކަމަށް "އަލް ޖަޒީރާއިން" ތުހުމަތުކުރެއެވެ. އިޒްރޭލުގައި ހަރުކޮށްފައިވާ މިސައިލުން ދިފާއުވުމުގެ ސިސްޓަމަށް އެހީވުމަށް ސެނެޓުން މިއަހަރު ވެސް ވަނީ 225 މިލިއަން އެމެރިކާ ޑޮލަރު ހަރަދުކުރުމަށް ނިންމައިފައިވާކަމަށް އެ ނޫހުން ބުނެއެވެ. 

އިޒްރޭލަށް ހަތިރާރު ފޯރުކޮށްދީ އެގައުމުގެ ދިފާއީ ނިޒާމަށް އެހީތެރިވުމުގެ މަސައްކަތްތައް އެމެރިކާއިން ހުއްޓުމެއް ނެތި ކުރިއަށް ގެންދާއިރު، އެމެރިކާގެ ރައީސް ބަރަކް އޮބާމާ ވަނީ އިޒްރޭލުން ޢައްޒާއަށް ދެމުން ގެންދާ ހަމަލާތައް ހުއްޓާލުމަށް ގޮވާލައްވާފައެވެ. 

ޖުލައި 8 ވަނަ ދުވަހުން ފެށިގެން އިޒްރޭލުން ފަލަސްތީނުގެ ޢައްޒާއަށް ދެމުން ގެންދާ ހަމަލާތަކުގައި ޣައްޒާގެ 1361 މީހުން މަރުވެފައިވާކަމަށް ފަލަސްތީނުގެ ސިއްހަތާއި ބެހޭ ވުޒާރާއިން ވަނީ ހާމަކޮށްފައެވެ. އިޒްރޭލުން ބުނެފައިވަނީ މިހާތަނަށް އެ ގައުމުގެ 53 މީހުން މަރުވެފައިވާ ކަމަށެވެ.