މެލޭޝިޔާގެ މަތިންދާ ބޯޓު ހޯދުމުގެ މަސައްކަތަށް ދެތިން ދުވަހަށް ހަނގުރާމަ ހުއްޓާލުމަށް އެއްބަސްވެއްޖެ
18 ޖުލައި 2014 16:37
މަތިންދާ ބޯޓު ވެއްޓިފައިވާ ސަރަހައްދުގައި ސިފައިންތަކެއް ބަލަހައްޓައިގެން
298 މީހުންނާއެކު ވެއްޓިފައިވާ މެލޭޝިއަން އެއަރލައިންގެ މަތިންދާބޯޓު ހޯދުމުގެ މަސައްކަތް ކުރުމަށް ދެތިން ދުވަހަށް ހަނގުރާމަ ހުއްޓާލުމަށް ޔޫކްރެއިން ސަރުކާރާ ދެކޮޅަށް ހަނގުރާމަކުރަމުން އަންނަ ހަނގުރާމަވެރިން އެއްބެސްވެއްޖެއެވެ.
ހަނގުރާމަވެރިން މިކަން ހާމަކޮށްފައިވަނީ ބޯޓު ވެއްޓުނީ އެއަށް ރޮކެޓް ހަމަލާދީގެންކަމަށް ބެލެވޭކަމަށާއި އަދި މިމައްސަލަ ތަޙްޤީޤް ކުރުމަށް އެމެރިކާ އަދި ޖަރުމަނު ފަދަ ޤައުމުތަކުން ގޮވާލާފައިވަނިކޮށެވެ.
ރަޝިއާގެ ބޯޑަރާއި 50 ކިލޯމީޓަރު ދުރުގައިވާ ޔޫކްރެއިންގެ ދަނޑު ސަރަޙައްދުގެ އެތަން މިތަނުގައިވާ ބޯޓުގެ ބައިތަކާއި ބޯޓުން ދަތުރުކުރި މީހުންގެ ގުނަވަންތަކާއި ހަށިތައް ނެގުމުގެ މަސައްކަތް އިމަޖެންސީ ވޯކަރުންނާއި، ޕޮލިސް އޮފިސަރުންނާއި އަދި ކޯލް މައިނަރުންދަނީ މިހާރު މަސައްކަތް ކުރަމުންނެވެ.
މަރުވެފައިވާ މީހުންގެ ހަށިތަށް ފާހަގަ ކުރުމަށް ހުދު ފޮތިގަނޑެއް ޖަހާފައިވާ ދަނޑިތަކެއް ރެސްކިއު ޓީމުންދަނީ ބޭނުން ކުރަމުންކަމަށް އަލްޖަޒީރާއިން ހާމަކޮށްފައިވެއެވެ.
ޔޫކްރެއިންގެ ސަރުކާރުންވަނީ މަތިންދާބޯޓަށް ބަޑިޖެހީ ކޮންބައެއްތޯ ހޯދުމަށް ބައިނަލްއަޤްވާމީ ތަޙްޤީޤެއް ކުރަންޖެހޭނެކަމަށް ގޮވާލާފައެވެ.
މައްސަލާގައި ޔޫކްރެއިންގެ އަސްކަރިއްޔާގެ އެއްވެސް އަތެއް ނުވާކަމަށް ޔޫކްރެއިންވަނީ ހާމަކޮށްފައެވެ.
ކިޔުންތެރިންގެ ހިޔާލު