މެލޭޝިއަން އެއަރލައިންގެ މަތިންދާ ބޯޓެއް ވައްޓާލައިފި

ރަޝިއާއާއި ޔޫކްރެއިންގެ ބޯޑަރާ ދިމާމަތިން އުދުހިފައިދިޔަ މެލޭޝިއަން އެއަރލައިންގެ މަތިންދާބޯޓެއް ވައްޓާލައިފިކަމަށް ބޭރުގެ ޚަބަރުފަތުރާ ވަސީލަތްތަކުން ހާމަކޮށްފިއެވެ.

ނޫސްތަކުން ބުނާގޮތުގައި ފްލައިޓް އެމްއެޗް17 ގެ މަތިންދާބޯޓު ވައްޓާލާފައިވާއިރު އޭގައި ތިބީ 280 ފަސިންޖަރުންނާއި 15 ބޯޓު ކުރޫއިންނެވެ.

އިންޓަފެކްސް ނޫސް އޭޖެންސީއިން ހާމަކުރާގޮތުގައި ބޯޓު ގެއްލިފައިވަނީ ރަޝިއާއަށް ތާއިދުކުރާ ހަނގުރާމަވެރިން ޔޫކްރެއިންގެ ސަރުކާރުގެ ސަލާމަތީބާރާއި އެންމެ ގަދަޔަށް ކުރިމަތިލުންތައް ބަދަލުކުރަމުންދާ ޑޮނެޓްސް ކައިރިންނެވެ.

އެހިސާބުން ނަގާފައިވާ ފޮޓޯތަކެއްކަމަށް ބުނާ ފޮޓޯތަކެއް އެކި ޓީވީ ޗެނަލްތަކުން ދައްކާފައިވާއިރު މަތިންދާބޯޓުން އަރައިގެންދިޔަ ދުންތަކެއްކަމަށް ބެލެވޭ ދުންގަނޑެއް ފެނެއެވެ. ޚަބަރުތަކުން ބުނާގޮތުގައި އެންމެ ބޮޑަށް ބެލެވެނީ ރަޝިއާގެ ވައިގެ ސަރަޙައްދަށް ވަނުމުގެ ކުރިން މަތިންދާބޯޓަށް ވަނީ ބީޔޫކޭ ސަރފޭސް ޓު އެއަރ މިސައިލްތަކުން 33000 ފޫޓުމަތިން ހަމަލާދީފައެވެ.

ނޫސްތަކުން ހާމަކުރާގޮތުގައި މިފަދަ މިސައިލްތަކަކީ ކުޑަ ތަމްރީނަކާ އެކު އެންމެ މީހަކަށްވެސް ފޮނުވާލެވޭ ފަދަ ހަތިޔާރެކެވެ.

ދިފާއީ މާހިރުން މީގެ ކުރިންވެސްވަނީ މިސަރަޙައްދުގައި މިފަދަ ހާދިސާއެއް ހިނގާފާނޭކަމުގެ ބިރުއޮތްކަން ހާމަކޮށްފައެވެ.