ނޫސްކޮންފަރެސްގައި ނަތަންޔާހޫ ވާހަކަދައްކަނިކޮށް ރޮކެޓް ހަމަލާތަކެއްދީފި
14 ޖުލައި 2014 15:00
ޔަހޫދީ އިސްތިއުމާރުގެ ބޮޑުވަޒީރު ބެންޖަމިން ނަތަންޔާހޫ
ޔަހޫދީ އިސްތިއުމާރުގެ ބޮޑުވަޒީރު ބެންޖަމިން ނަތަންޔާހޫ ތަލްއަބީބްގައި ނޫސްކޮންފަރެންސެއް ބާއްވަމުން ދަނިކޮށް އެސަރަޙައްދަށް ރޮކެޓް ހަމަލާތަކެއް ދީފިއެވެ.
ޚަބަރުފަތުރާ ވަސީލަތްތަކުން ހާމަކުރާގޮތުގައި މިހަމަލާތައް ދީފައިވަނީ ފަލަސްތީނުގެ ޤައްސާމް ބްރައިގޭޑްގެ ހަނގުރާމަވެރިންނެވެ.
ޤައްސާމް ބްރައިގޭޑުން މިހަމަލާ ދީފައިވަނީ ފަލަސްތީނުގެ ބިންތަކަށް އަރައި އެތަނުގައި ހަންފަތުރަމުންދާ އަނިޔާވެރި ޔަހޫދީ އިސްތިއުމާރީ ބާރުން ފަލަސްތީނުގެ ޣައްޒާއަށް އެކިވަރުގެ ހަމަލާދީ ފަލަސްތީނުގެ ކުށެއްނެތް ނިކަމެތި ރައްޔިތުން ޝަހީދު ކުރަމުންދާތީ އޭގެ ބަދަލެއްގެ ގޮތުންނެވެ.
ޔަހޫދީ އިސްތިއުމާރުން ދެމުންގެންދާ ލާއިންސާނީ ހަމަލާތަކަށް ޤައްސާމް ބްރައިގޭޑުންދިން ރޮކެޓް ހަމަލާއިން ނަތަންޔާހޫއަށް އެއްވެސް ގެއްލުމެއް ލިބިފައެއް ނުވެއެވެ.
އިޒްރޭލުން ފަލަސްތުނުގެ ޣައްޒާއަށް ދީފައިވާ ހަމަލާތަކުގައި މިހާތަނަށް ވަނީ 170 މީހުން މަރުވެފަ އެވެ. އަދި ހާހަކަށްވުރެ ގިނަ ފަލަސްތީނު މީހުންނަށް ވަނީ އަނިޔާވެފައެވެ. އޭގެތެރޭގައި ގިނައީ އާންމުންނެވެ. ގިނައަދަދަކަށް ކުޑަކުދިންނާއި އަންހެނުންވެސް ހިމެނެއެވެ. އެހެން ނަމަވެސް އިޒްރޭލުން ބުނަމުން ގެންދަނީ އެމީހުންގެ ހަމަލާތައް އަމާޒު ކުރަނީ "ޓެރަރިސްޓު" ހަނގުރާމަވެރިން ދިރިއުޅޭ ސަރަހައްދުތަކަށް ކަމަށެވެ.
ދާދިފަހުން ބޭއްވި ނޫސްކޮންފަރެންސެއްގައި ނަތަންޔާހޫ ބުނެފައިވާގޮތުގައި ބައިނަލްއަގުވާމީ ގޮތުން އިޒްރޭލަށް ކިތަންމެ ޕްރެޝަރެއް ކުރިކަމުގައިވިއަސް އިޒްރޭލުން ފަލަސްތީނަށް ހަމަލާދިނުން ނުހުއްޓާނެކަމަށެވެ.
ކިޔުންތެރިންގެ ހިޔާލު