ޗައިނާގެ ޝިންޗޭންގެ ސްކޫލުތަކުގައި ކިޔަވާކުދިން ރޯދަހިފުން މަނާކޮށްފި
14 ޖުލައި 2014 10:07
ފޮޓޯ ބީސީ :ޝިންޗޭންގަކީ ޗައިނާގެ މުސްލިމުން ގިނަ ސަރަހައްދެއް
ޗައީނާގައި މުސްލިމު އާބާދީ ގިނަ ސަރަހައްދެއް ކަމަށްވާ ޝިންޗޭންގްގެ ސްކޫލުތަކުގައި ކިޔަވާކުދިން ރޯދަހިފުން މަނާކޮށް އެކުދިންނަށް ބިރުދައްކައިގެން ކާންދެމުން އަންނަކަމަށް ބީބީސީން ބުނެފިއެވެ.
ނަން ހާމަ ނުކުރުމަށް ޝަރުތުކޮށް ބީބީސީއަށް މައުލޫމާތު ދިން އެ ސަހަރުގެ ތިން މުސްލިމު ދަރިވަރުން ބުނެފައިވަނީ އެކުދިންގެ ޔުނިވާސިޓީން ރޯދަމަހުގެ ދުވާލު ވަގުތުތަކުގައި ކާން މަޖުބޫރު ކޮށްފައިވާކަމަށެވެ. ރޯދަ ދޫކޮށްލާކަން ޔަގީން ކުރުމުގެ ގޮތުން ޓީޗަރެއްގެ ކުރިމަތީގައި ކޮންމެ ދުވަހަކުވެސް ކާންޖެހޭކަމަށް ބުންޏެވެ. ރޯދަ މަހު ދުވާލުވަގުތުގައި ކެއުމަށް ދެކޮޅު ހަދާ ކުދިންނަށް އަންނަނީ ހަރުކަށި އަދަބުދެމުންނެވެ.
"ހަމަޖެހިގެން މިތަނުގައި އުޅެން ބޭނުންނަމަ ރޯދައެއް ނުހިފޭނެ،" ބީބީސީއަށް މައުލޫމާތު ދިން ކުއްޖަކު ބުނެފައިވެއެވެ. އެކުދިން ބުނީ ޝިންޗޭންގުގެ ހުރިހާ ޔުނިވާސިޓީއެއްގައި ވެސް ދަރިވަރުން ރޯދަނުހިފުމަށް އަންގާފައިވާކަމަށެވެ.
އެ ސަރަހައްދުގައި ދިރިއުޅޭ މުސްލިމުންނަށް އަނަނީ ތަފާތު ދަތިތަކަކާއި ކުރިމަތިކުރުވަމުންނެވެ. ސަރުކާރު ހޮސްޕިޓަލެއްގައި މަސައްތްކުރާ މުސްލިމު މުވައްޒަފުންނަށް ވެސް ވަނީ އެމީހުން ރޯދަ ނުހިފުމަށް އެއްބަސް ކުރުވައި އެގްރީމަންޓެއްގައި ސޮއި ކުރުވައިފައެވެ. ސަރުކާރުން ހިނގާ ބައެއް ނޫސްތަކުން ދަނީ ކައިބޮއި ނުހަދައި ގިނަވަތުވުމުން ހަށިގަނޑަށް ގެއްލުންލިބޭކަމަށް ބުނެ ރިޕޯޓުތައް ވެސް ޝާއިއުކުރަމުންނެވެ.
މީގެ ކުރިން ވެސް ޝިންޗޭންގުގެ މުސްލިމުން ރޯދަހިފުމަށް ޗައިނާ ސަރުކާރުން މަނާކޮށްފައިވެއެވެ.
ކިޔުންތެރިންގެ ހިޔާލު