އިންޑިއާގައި ގޭސް ހޮޅިއެއް ފަޅައިގެން ގޮސް 14 މީހުން މަރުވެއްޖެ
27 ޖޫން 2014 16:19
އިންޑިއާގެ ދެކުނުގެ ސްޓޭޓެއްކަމަށްވާ އަންދްރަ ޕްރަދޭޝް ގައި މިއަދު ގޭސް ހޮޅިއެއް ފަޅައިގެންގޮސްގެން ހިނގި އަލިފާނުގެ ހާދިސާއެއްގައި 14 މީހުން މަރުވެއްޖެއެވެ.
މަރުވި މީހުންގެ އިތުރުން 10 މީހުން ޒަހަމްވެފައިވެއެވެ. ފަޅައިގެން ގޮސްފައިވަނީ ގޭސް އޮތޯރިޓީ އޮފް އިންޑިއާ (ގައިލް) ގެ ގޭސް ހޮޅިއެއްކަމަށް ބީބީސީން ބުނެއެވެ. ގައިލް އަކީ އިންޑިއާގައި ގޭސް އުފައްދާ އެންމެބޮޑު އެއް ކުންފުންޏެވެ.
މިއަދު ހެނދުނު ހިނގި ހާދިސާގައި އަލިފާންގަނޑު ކޮންޓްރޯލް ކުރެވުނުއިރު އެ ސަރަހައްދުގައި ހުރި އެތައް ބައިވަރުގެތަކެއް ވެސް ވަނީ އަނދާހުލިވެފައެވެ. އަދި މަރުވި މީހުންގެ އަދަދު އިތުރުވުމަކީ ވެސް އެކަށީގެންވާކަމެއް ކަމަށް އަންދްރަ ޕްރަދޭޝްގެ ހޯމް މިނިސްޓްރީން ވަނީ ބުނެފައެވެ.
މިދިޔަ ހަފްތާގައި ވެސް އިންޑިއާގެ ޗައްތީސްގަޅު ސްޓޭޓުގައި ވިހަ ގޭސް ލީކުވުމުގެ ސަބަބުން ވަނީ ހަ މީހުން މަރުވެފައެވެ.
ކިޔުންތެރިންގެ ހިޔާލު