އެމެރިކާއިން ޢިރާގަށް އަސްކަރީ އެހީތެރިކަން ފޯރުކޮށްދެނީ

ޢިރާގު ސަރުކާރަށް އަސްކާރީގޮތުން އެހީތެރިވުމަށް އެމެރިކާގެ ރައީސް ބަރަކް އޮބާމާ ނިންމަވައިފިއެވެ.

އޮބާމާ މިގޮތަށް ނިންމަވާފައިވަނީ ޢިރާގުގެ ބައެއް ސަހަރުތައް ސުންނީ ހަނގުރާމަވެރި ޖަމާއަތްތަކުގެ ބާރުގެ ދަށަށްގެންނަމުންދާ ދަނޑިވަޅެއްގައެވެ. އިރާގު ސަރުކާރުންވަނީ އެގަމުގެ ސަރުކާރާއި ހަނގުރާމަކުރަމުން އަންނަ ސުންނީ މުސްލިމުގެ ފައުޖުތަކާއި ހަނގުރާމަކުރުމަށް އެމެރިކާގެ އެހީތެރިކަމަށް އެދިފައިއެވެ. އެގައުމުގައި މިހާރު އޮންނަނީ ޝިޔައީ ސަރުކާރެކެވެ.

އޮބާމާ ވަނީ ޢިރާގަށް އެމެރިކާ ސިފައިންފޮނުވުމަށް ކޮންގްރެސްގެ ހުއްދައެއް ބޭނުންނުވާނެކަމަށް ވިދާޅުވެފައެވެ. އެމެރިކާގެ ރައީސަކަށް ހުންނަ ބޭފުޅަކަށް ކޮންގްރެސްގެ ހުއްދައާއި ނުލައިވެސް އަސްކަރީ އޮޕަރޭޝަންތައް ހިންގިދާނެއެވެ. އެހެން ނަމަވެސް އާންމު އުސޫލެއްގެ ގޮތުން އެހެން ގައުމެއްގައި އަސްކަރީ އޮޕަރޭޝަނެއް ހިންގާނަމަ ކޮންގްރެސްގެ ހުއްދަ ހޯދައެވެ.

ވައިޓް ހައުސްއިން ނެރުނު ބަޔާނެއްގައިބުނެފައިވަނީ އެމެރިކާގެ ނައިބު ރައީސް ޖޯއޭ ބިޑެން އާއި ޢިރާގުގެ ޕްރައިމް މިނިސްޓަރު ނޫރީ މާލިކީ އާއި ދެމެދު މަޝްވަރާތަކެއް ކޮށްފައިވާކަމަށެވެ. މަޝްވަރާތަކުގައި ޢިރާގު ސަހަރުތައް ހިފަމުން އަންނަ ސުންނީ މުސްލިމުންގެ ޖަމާއަތްތަކަށް ހަމަލާދިނުމުގައި އެމެރިކާއަށް އެހީތެރިވެވިދާނެ ގޮތްތަކާއިމެދު މަޝްވަރާކޮށްފައިވެއެވެ.

ބީބީސީން ބުނެފައިވަނީ އެމެރިކާއިން ސުންނީ ހަނގުރާމަވެރިންނަށް ވައިގެ ހަމަލާދިނުން ވެސް އެކަށީގެންވާ ކަމަށެެވެ. ނުވަތަ ޑްރޯން (އަމިއްލަށް އުދުހޭ ފްލައިޓް) ބޭނުންކޮށްގެން ޢިރާގުގެ ސިފައިންނަށް އެހީތެރިކަން ފޯރުކޮށްދިނުން ވެސް އެކަށީގެންވާ ކަމަށެވެ. ނަމަވެސް އެމެރިކާއިން އެހީތެރިކަން ފޯރުކޮށްދޭނެގޮތެއް އަދިހާމައެއް ނުކުރެއެވެ.

އެމެރިކާއިން 2003 ވަނަ އަހަރު ވެސް ޢިރާގަށް އަރާފައިވެއެވެ. އެމެރިކާއިން ވަނީ އޭރު ޢިރާގުގެ ވެރިކަމުގައި ހުންވި ސައްދާމު ހުސޭނުގެ ފައުޖުތައް ބަލިކޮށް އޭނާ ހައްޔަރުކޮށްފައެވެ. މި ހަނގުރާއަށްފަހު ޢިރާގުގައި ތިބި އެމެރިކާ ސިފައިން ބާލާފައިވަނީ 2011 ވަނަ އަހަރުއެވެ.