ސޫރިޔާގެ އިންތިހާބު ބައްޝާރު ކާމިޔާބު ކުރައްވައިފި

ސޫރިއާގެ އިންތިހާބު އެ ގައުމުގެ ރައީސް ބައްޝާރުލް އަސަދު ކާމިޔާބު ކުރައްވައިފިއެ އެވެ.

މެދުކެނޑުމެއްނެތި ތިން އަހަރު ވަންދެން ދާހިލީ ހަނގުރާމަ ކުރަމުން އަންނަ ސޫރިއާގެ އިންތިހާބު އަސަދު ކާމިޔާބު ކުރައްވާފައިވަނީ ވޯޓުގެ 88.7 ޕަސަންޓު ކާމިޔާބު ކުރައްވައިގެނެވެ.

އަންގާރަ ދުވަހު ފެށި އިންތިހާބުގައި އަސަދާ ވާދަކުރެއްވި، ހަސަނަލް ނޫރީއަށް ލިބިވަޑައިގަތީ 4.3 ޕަސަންޓެވެ. މަހާ ހަޖަރަށް ލިބި ވަޑައިގެންފައިވަނީ 3.2 ޕަސަންޓު ވޯޓެވެ.

މިއީ އެތައް އަހަރުތަކަކަށްފަހު ރިޔާސީ އިންތިހާބެއްގައި ބައްޝާރު ފިިޔަވައި އެހެން މީހަކަށް ވާދަކުރުމުގެ ފުރުސަތު ލިބުނު ފުރަތަމަ ފަހަރެވެ.

ސޫރިއާގެ ސުޕްރީމް ކޮންސްޓިޓިއުޝަނަލް ކޯޓުން ބުނެފައިވަނީ 73.42 ޕަސަންޓު މީހުން ވޯޓުލުމަށް ނުކުމެފައިވާ ކަމަށެވެ. ސޫރިއާ ސަރުކާރުން މިހެން ބުނިކަމުގައި ވިއަސް، ހަނގުރާމަވެރިންނާއި އެމީހުންގެ ސަޕޯޓަރުން ރިޔާސީ އިންތިހާބުގައި ބައިވެރިވެފައެއް ނުވެއެވެ. އެމީހުންގެ ކޮންޓްރޯލް ދަށުގައި ހުރި ސަރަހައްދުތަކުގައި ވޯޓު ފޮށި ބަހައްޓަފައެއް ނުވެއެވެ.

އިންތިހާބުގެ ނަތީޖާއަށްފަހު ދިމިސްކުގައި ބައްޝާރުގެ ސަޕޯޓަރުން ގެންދަނީ އުފާ ފާޅުކުރަމުންނެވެ.

ނަމަވެސް ޔޫރަޕުގެ ގައުމު ތަކުންނާއި، އެމެރިކާއިން ބުނެފައިވަނީ ސޫރިއާގެ ރިޔާސީ އިންތިހާބަކީ އިންސާފުވެރި އިންތިހާބެއް ކަމަށް ބަލައިނުގަނެވޭނެ ކަމަށެވެ.