އެމްއެޗް 370 ގެ ކަޅުފޮށީގެ ސިގުނަލް ލިބުނު ސަރަހައްދުގައި އެ ބޯޓު ނެތް

މެލޭޝިއާގެ އެމްއެޗް 370 ގެ ކަޅުފޮށީގެ ސިގުނަލް ލިބުނު ސަރަހައްދުގައި އެ ބޯޓު ނެތްކަމަށް ބޯޓު ހޯދުމުގައި މަސައްކަތްކުރާ ޓީމުން މިއަދު ބުނެފި އެވެ.

"ޖޮއިންޓްއެޖެންސީ ކޯޑިނޭޝަން ސެންޓަރުގެ" ޓީމުން މިއަދު ބުނެފައިވަނީ، އެމެރިކާގެ ކަނޑުގެ ސިފައިންގެ "ބްލޫ ފިން 21" ސަބް މެރީނުން، އެންމެ ފަހުން އެބޯޓުގެ ސިގުނަލް ލިބުނު އިންޑިއާ ކަނޑުގެ ސަރަހައްދު ބަލައި ނިމިފައިވާކަމަށާއި، އެހެން ނަމަވެސް ބޯޓު އެ ސަރަހައްދުގައި އޮތްކަމުގެ އެއްވެސް ހެއްކެއް ފެންނާން ނެތްކަމަށެވެ.

"އެއީ އެ ބޯޓު ވެއްޓުނު ސަރަހައްދު ކަމަށް ބެލެވޭކަށް ނެތް" އިންޑިއާ ކަނޑުގެ 850 އަކަ ކިލޯމީޓަރުގެ ސަރަހައްދެއް ބަލައި ހޯދުމަށްފަހު މެލޭޝިއާ އެއާލައިނުގެ ބޯޓު ހޯދުމަށް ހަރަކާތްތެރިވާ ޓީމުން މިއަދު ނެރުނު ބަޔާނެއްގައި ބުނެފައިވެއެވެ.

މާޗު މަހުގެ 8 ވަނަ ދުވަހު ވީނުވީއެއް ނޭގި ގެއްލުނު މެލޭޝިއާ އެއާލައިނުގެ ބޯޓު ގެއްލުނު އިރު ބޯޓު ދަތުރުކުރަމުން ދިޔައީ މެލޭޝިއާގެ ކުއާލަލަމްޕޫރުން ޗައިނާގެ ބޭޖިން އަށެވެ. ގެއްލުނުއިރު ބޯޓުގައި 239 ފަސިންޖަރުން ތިބިކަމަށް އެއާލައިނުން ވަނީ ހާމަކޮށްފައެވެ.

ބޯޓު ހޯދުމުގެ މަސައްކަތުގައި ހަރަކާތްތެރިވާ މީހުން ބުނެފައިވަނީ، ބޯޓު ދަތުރުކުރި މިސްރާބު ބަދަލުކުރުމަށްފަހު އިންޑިއާ ކަނޑާ ދިމާއަށް މިސްރާބު ޖެހިކަމަށް ބެލެވޭ ކަމަށެވެ. އެހެންނަމަވެސް އަދި އަދާ ހަމައަށްވެސް ބޮއިން 777 މަރުކާގެ މި ބޯޓުގެ އެއްވެސް ބައެއް ފެނިފައެއް ނުވެ އެވެ.