ޢިރާޤުގެ އެކި ސަރަޙައްދުތަކުގައި 10 ބޮން ގޮއްވާލައި އެތައްބަޔަކު މަރާލައިފި
18 ފެބްރުއަރީ 2014 22:55
ބަޣުދާދުގައި ކާރުބޮމެއް ގޮއްވާލައި އެތައްބަޔަކު މަރުވި ހަދީސާ
ޢިރާޤުގެ އެކި ސަރަޙައްދު ތަކުގައި 10 ކާރު ބޮން މިއަދު ގޮއްވާލައި އެތަކެއް ބަޔަކު މަރާލައިފިއެވެ.
މި ދިހަ ކާރުބޮމުގެ ތެރެއިން ފަސް ބޮން ގޮއްވާލާފައިވަނީ ޢިރާޤުގެ ވެރިރަށް ބަޣްދާދުގައެވެ. ބަޣްދާދުގައި ގޮއްވާލާފައިވާ ކާރުބޮމުގެ ސަބަބުން 10 މީހުން މަރުވެފައިވެއެވެ. އޭއެފްޕީއިން ހާމަކުރާގޮތުގައި މިހަމަލާތަކުގެ ސަބަބުން މަދުވެގެން 30 މީހުންނަށް އެކިވަރުގެ އަނިޔާވަނީ ލިބިފައެވެ.
ބާޔާ ސަރަޙައްދުގައި 2 ކާރު ބޮން ގޮއްވާލުމުގެ ސަބަބުން ފަސް މީހަކު މަރުވެފައިވާއިރު އެތަނާ ކައިރި އެހެން ސަރަޙައްދެއްގައިވަނީ އެފަދަ ބޮމުގެ ހަމަލާއެއްދީ ދެމީހަކު މަރާލާފައެވެ.
މީގެ އިތުރަށް ހިއްލާގައިވަނީ ތިން ކާރުބޮން ގޮއްވާލާފައެވެ. މިހަމަލާތަކުގައި ފަސް މީހުން މަރުވެފައިވާއިރު 22 މީހުންނަށްވަނީ އެކިވަރުގެ އަނިޔާ ލިބިފައެވެ. އަދި މުސައްޔިބުގައިއާއި އިސްކަންދަރިއްޔާގައި މިފަދަ ހަމަލާއެއް ދިނުމުގެ ސަބަބުން 4 މީހުން މަރުވެ 32 މީހުނަށްވަނީ އެކިވަރުގެ ޒަހަމްތަށް ލިބިފައެވެ.
ނޫސްތަކުން ބުނާގޮތުގައި މިއަހަރު ފެށުނީއްސުރެ ޢިރާޤްގައި ދެމުން އަންނަ މިފަދަ ހަމަލާތަކުގައި މަދުވެގެން 1450 މީހުން މަރުވެފައިވެއެވެ. އަދި ހަމައެކަނި މިމަހުގައިވެސް 470 މީހުން މަރާލެވިފައިވެއެވެ.
ކިޔުންތެރިންގެ ހިޔާލު