ޕާކިސްތާނު ސަރުކާރުން ތާލިބާނާ އެކު މަޝްވަރާ ބައްދަލުވުމެއް ބާއްވައިފި
7 ފެބްރުއަރީ 2014 2:23
ޕާކިސްތާން ސަރުކާރުން އެޤައުމުގައި ހަރަކާތްތެރިވަމުން އަންނަ ތާލިބާން ޖަމާޢަތާއެކު މަޝްވަރާ ބައްދަލުވުމެއް ބާއްވައިފިއެވެ.
އިސްލާމްއާބާދުގައި ބޭއްވުނު މިބައްދަލުވުމަކީ މުސްތަޤްބަލުގައި މިފަދަ އިތުރު ބައްދަލުވުންތަކަށް ބޭއްވުމަށް ކުރެހުނު މަގު ޗާޓެއްކަމުގައި ޕާކިސްތާނުގެ ސިޔާސީ މަސްރަހު ދިރާސާކުރާ ފަރާތްތަކުން ހާމަކުރެއެވެ. ނަމަވެސް ބައެއް ފަރާތްތަކުން ބުނާގޮތުގައި މިފަދަ ބައްދަލުވުންތަކުން ދެމިގެންދާނެ ސުލްހަވެރިކަމެއް ޤާއިމެއް ނުކުރެވޭނެއެވެ.
އިއްޔެ ބޭއްވުނު ތިންގަޑިއިރުގެ ބައްދަލުވުމުގެ ދެވަނަ އިށީނުން މިއަދު ބާއްވާނެކަމަށް ޕާކިސްތާނުގެ ސަރުކާރަށް ހަވާލާދީ ނޫސްތަކުން ހާމަކޮށްފައިވެއެވެ.
ޕާކިސްތާނުގެ ތާލިބާން ހަނގުރާމަވެރިން އެގައުމުގެ ސަރުކާރު ވައްޓާލައި އެތަނުގައި އިސްލާމީ ޝަރީޢަތަށް ޙުކުމްކުރާނެ ދައުލަތެއް އުފެއްދުމަށް ހަނގުރާމަ ކުރަމުންދާތާ މިހާރު އެތަކެއް އަހަރުތަކެއްވެފައިވާއިރު، އެޤައުމުގެ ބޮޑުވަޒީރު ނަވާޒު ޝަރީފު ވިދާޅުވާގޮތުގައި ހަނގުރާމަ ހުއްޓާލައި ސުލްހަވެރި އެއްބަސްވުމަކަށް އައުމަށް ތާލިބާނުން މިހާރު އޮތީ ތައްޔާރަށް ކަމަށެވެ.
ކިޔުންތެރިންގެ ހިޔާލު