ތައިލޭންޑުގެ ސަރުކާރަށް ތާއީދުކުރާ ލީޑަރެއްގެ ގަޔަށް ބަޑިޖަހައި ޒަޚަމްކޮށްލައިފި
24 ޖެނުއަރީ 2014 1:19
ތައިލޭންޑުގެ ސަރުކާރާ އެއްކޮޅު "ރަތް ގަމީސް" ހަރަކާތުގެ ލީޑަރެއްގެ ގަޔަށް ބަޑިޖަހައި އޭނާ ޒަޚަމްކޮށްލައިފިއެވެ.
ކްވަންޗާއި ޕްރައިޕަނާ ގަޔަށް އޭނާ ދިރިއުޅެމުން އަންނަ ގެ ކައިރިން ބަޑިޖަހައިފައިވަނީ އެޤައުމުގެ ބޮޑުވަޒީރު ޔިންގލަކް ޝިނަވަތްރާ ބެންކޮކްގައި ކުއްލި ޙާލަތު އިއުލާންކުރިތާ މާގިނައިރުތަކެއް ނުވަނީސްއެވެ.
ޕްރައިޕަނާގެ އާއިލާ މެމްބަރަކު ނޫސްވެރިންނަށް މައުލޫމާތު ދީފައިވާގޮތުގައި އޭނާގެ އަތަށާއި ފަޔަށްވަނީ ބަޑީގެ ހަމަލާ އަރާފައެވެ. އަދި އޭނާގެ ހަށިގަނޑުން ބަޑީގެ ވަޒަންތަށް ނަގައި މިހާރު އޭނާއަށް ދަނީ ހޮސްޕިޓަލުގައި ފަރުވާދެމުންނެވެ.
ފުލުހުން ބުނާގޮތުގައި މިއީ ސިޔާސީ ވާދަވެރިން ދީފައިވާ ހަމަލާއެއްކަމަށް ބެލެވޭކަމަށާއި އަދި މިމައްސަލަ މިހާރުދަނީ ތަޙްޤީޤްކުރަމުން ކަމަށެވެ.
ތައިލޭންޑުގެ ސަރުކާރުން މިހާރުވަނީ ބެންކޮކާއި ކައިރި ޕްރޮވިންސްތަކުގައި މީޑިއާ ސެންސަރުކޮށް، ފަސް މީހުންނަށްވުރެ ގިނަ މީހުންގެ ސިޔާސީ އެއްވުންތަށް މަނާކޮށްފައެވެ. އަދި ސަރުކާރުންވަނީ ސަލާމަތީ ބާރުތަކަށް ކާފިއު ހިންގުމާއި، ވޮރެންޓެއް ނެތި މީހުން ހައްޔަރުކުރުމުގެ ބާރު ދީފައެވެ.
ކިޔުންތެރިންގެ ހިޔާލު