ހަފްތާއަކު ދެ އަންހެނުން ސިޑްނީގައި އިސްލާމްދީނަށް ވަދޭ: ދިރާސާ

އޮސްޓްރޭލިއާގެ ސިޑްނީގައި އަހަރަކު ސަތޭކައަށްވުރެ ގިނަ އަންހެނުން އިސްލާމްދީނަށް ވަންނަ ކަމުގައި އެޤައުމުގައި ކުރި ދިރާސާއަކުން ދައްކައިފިއެވެ.

އޮސްޓްރޭލިއަން ނިއު މުސްލިމް އެސޯސިއޭޝަނުން ހާމަކުރިގޮތުގައި އޮސްޓްރޭލިއާގައި އިސްލާމްދީނަށް ވަންނަ މީހުންގެ 60 އިންސައްތަ މީހުންނަކީ އަންހެނުންނެވެ.

22 އަހަރުގެ ޖޫލިއާ މޫޚަލާތީ ނަސާރާދީން ދޫކޮށް އިސްލާމްދީނަށްވަނީ އުމުރުން 18 އަހަރުގައެވެ. އޭނާއަށް އޭނާގެ ފިރިމީހާ ރާއިދްއާ ފުރަތަމަ ބައްދަލުވީ ރެސްޓޯރެންޓެއްގައި ޙަލާލް ގެރިމަސް ހުރިތޯ ސުވާލުކުރަމުން ދަނިކޮށެވެ. ބައްދަލުވިތާ 3 މަސް ފަހުން އެމީހުން ވަނީ ކައިވެނިކޮށްފައެވެ.

"އަހަރެންގެ އާއިލާ މީހުން އަހަރެން ނަސާރާއަކަށްހެދީ. އެކަމަކު އަހަރެންގެ ސުވާލުތަކަށް އާއިލާގެ މެމްބަރުންނަށް ޖަވާބެއް ނުހޯދުނު. ދެން އަހަރެން ހައްޤުދީން ހޯދަން ފެށީ. އަހަރެންނަށް އިސްލާމްދީނުގެ ގޮތްތައް ވަރަށް ކަމުދިޔަ. އަދި އިސްލާމްދީނުގައި އަންހެނުންނަށް ދެވިފައިވާ ރައްކާތެރިކަމާއި، މަތިވެރިކަން އެއީ އަހަރެން އިސްލާމްދީނަށް ލޯހުޅުވުނު އެއްސަބަބު،" އޭނާ ކިޔައިދިނެވެ."އިސްލާމްދީނުގެ ޙަޤީޤަތް ބޭނުންވާނަމަ އޮތީ ޤުރުއާނާއި ސުންނަތް ދިރާސާކުރުން. އިސްލާމްދީނަށް ނިސްބަތްވާ މީހުން އުޅޭގޮތް ބެލުމެއް ނޫން،" ޖޫލިއާ ހާމަކުރިއެވެ.

އޮސްޓޭލިއާގައި އިސްލާމްދީން ފެތުރެމުންދާތީ އެކަމާ ދެކޮޅަށް އެޤައުމުގެ ޕާލިމެންޓުގެ ބައެއް މެމްބަރުންވަނީ އަޑު އުފުލާފައެވެ. އެގޮތުން އެތަނުން އެއްމެމްބަރަކު ތުހުމަތުކޮށްފައިވާގޮތުގައި އެޤައުމުގެ މީހުން އިސްލާމްދީން ޤަބޫލުކުރަނީ ޙާލާލް މަސް ރެސްޓޯރަންޓްތަކުގައި ގިނަވެ އެމަސްކެއުމުގެ ސަބަބުންނެވެ.

“އޮސްޓްރޭލިއާގެ ރައްޔިތުންގެ ޤަސްދަކާ ނުލައި ޙާލާލް މަސްކެއުމުގެ ސަބަބުން އަހަރެމެންނަށް މިތިބެވެނީ އިސްލާމްވުމާ ވަރަށް ގާތުގައި. މިފަދަ ކަމެއް އަހަރެމެންނަށް ނޭގިތިބެ، އަހަރެމެންގެ އިޚްތިޔާރަކާ ނުލައި މަޖްބޫރުން މިގޮތަށް ކުރުވުމީ އެއްގޮތަކަށްވެސް ވެގެންވާނޭ ކަމެއް ނޫން،” ސިމްޕްކިންސް ބުންޏެވެ.

ސިމްޕްކިންސްގެ ވާހަކަ ނިމުމުން އޮސްޓްރޭލިއާގެ އިމިގްރޭޝަން މިނިސްޓަރުވަނީ އޭނާއަށް ވަރަށް ބޮޑަށް ފާޑުކިޔާފައެވެ. “ހުރިހާ މެމްބަރުންވެސް ކުރަންޖެހޭކަމަކީ އަނެކާއަށް ޖެއްސުންކުރުން ދޫކޮށް އަނެކާއަށް އިޙްތިރާމްކުރަން. އެކަކު އަނެކަކުގެ އިޚްސާސްތައް ދަންނަންވާނެ. ނަމަވެސް މިއަދު ސިމްޕްކިންސް ދައްކާފައި މިވަނީ އޭގެ ދިމާ އިދިކޮޅު،” އޭނާ ހާމަކުރިއެވެ.