ވިއެޓްނާމްގައި ފެންބޮޑުވެ އެތަކެއް މީހުން މަރުވެއްޖެ

ވިއެޓްނާމްގެ އެކި ސަރަހައްދުތަކަށް ބޯކޮށް ވާރޭވެހި ފެންބޮޑުވުމުގެ ސަބަބުން މަދުވެގެން 34 މީހުން މަރުވެ، މަދުވެގެން 11 މީހަކު ގެއްލި 80000 މީހުން މަގުމަތިވެއްޖެއެވެ.

ވިއެޓްނާމްގެ އޮފިޝަލަކު ހާމަކުރިގޮތުގައި މިއީ 1999 އަހަރު އެޤައުމަށް ކުރިމަތިވި މިފަދަ ހާދިސާއަށް ފަހު ލިބުނު އެންމެ ގެއްލުން ބޮޑު ހާދިސާއެވެ.

"މަދުވެގެން 11 މީހުން މިހާރުވަނީ ވީނުވީއެއް ނޭނގި ގެއްލިފައި. 100000 އަށް ވުރެ ގިނަ ގެ ވަނީ އެއްކޮށް ފެންބޮޑުވެފައި. ދަތުރުފަތުރުކުރުން ވަނީ އުނދަގޫވެފައި. އެހެނީ މަގުތަކާއި ރޭލުވޭ ސްޓޭޝަންތައްވަނީ ހަލާކުވެފަ،" ޑަނަންގް ސިޓީގެ އޮފިޝަލެއް ކަމުގައިވާ ގުޔެން ގަންގް ޓްރަންގް ހާމަކުރިއެވެ.

ޓްރަންގް އިތުރަށް މަޢުލޫމާތު ދީފައިވާގޮތުގައި މިކާރިސާގެ ސަބަބުން 65 މިލިއަން އެމެރިކާ ޑޮލަރުގެ ގެއްލުން އެޤައުމަށްވަނީ ވެފައެވެ.

ނެޝަނަލް ފްލަޑް އެންޑް ސްޓޯމް ކޮންޓްރޯލް އޭޖެންސީއިން ހާމަކޮށްފައިވާ ގޮތުގައި މަރުވި މީހުންގެ ޢަދަދު އަދި ކަށަވަރު ނުވާކަމުގައިވިނަމަވެސް މިހާތަނަށް މަދުވެގެން 34 މީހުން މަރުވެފައިވެއެވެ.