ބަންގްލަދޭޝްގެ އިދިކޮޅުފަރާތްތަކުން ސަރުކާރާ ދެކޮޅަށް ވަރުގަދަ މުޒާހަރާތަކެއް ބާއްވަނީ
28 އޮކްޓޯބަރ 2013 4:10
ބަންގްލަދޭޝްގެ އިދިކޮޅުފަރާތްތަކުން އެޤައުމުގެ ސަރުކާރާ ދެކޮޅަށް އެޤައުމުގެ އެކި ކަންކޮޅުތަކުގައި ބާއްވަމުން އަންނަ މުޒާހަރާތަކުގައި ފުލުހުންނާއި މުޒާހަރާކުރާ މީހުންނާ ދެމެދު ހަމަނުޖެހުންތަކެއް ހިނގަމުންދާ ކަމުގައި އެޤައުމުގެ ނޫސްތަކުން ހާމަކޮށްފިއެވެ.
ނޫސްތަކުން މަޢުލޫމާތުދޭގޮތުގައި ބަންގްލަދޭޝްގެ އެކި ސަރަޙައްދުތަކުގައި މިހާރު ބާއްވަމުން އަންނަ މުޒާހަރާތަކުގައި މިހައިތަނަށް 9 މީހުން މަރުވެ ގިނަ ބަޔަކަށްވަނީ އެކިވަރުގެ ޒަޚަމްތައް ލިބިފައެވެ.
ޚާލިދާ ޒިޔާ އިސްވެ ހުންނަވާ އިދިކޮޅު އެންމެ ބޮޑު ޕާޓީ، ބަންގްލަދޭޝް ނެޝަނަލް ޕާޓީ، (ބީއެންޕީ) އިން ގޮވާލަމުންދަނީ އަންނަ އަހަރު ޖެނުއަރީ މަހު ބޭއްވުމަށް ހަމަޖެހިފައިވާ އިންތިޚާބުގެ ކުރިން އެޤައުމުގެ ބޮޑު ވަޒީރު ޝެއިޚް ހަސީނާ އިސްތިއުފާދީ ވެރިކަން އިންތިޤާލީ ސަރުކާރަކާ ހަވާލުކުރުމަށެވެ.
މިހަމަނުޖެހުން ހައްލުކުރުމަށް ޚާލިދާއާއި ހަސީނާ ވަނީ މިދިޔަ ހޮނިހިރު ދުވަހު ފޯނުން ވާހަކަދައްކަވާފައެވެ. އަދި މުޒާހަރާ ހުއްޓާލުމަށް ހަސީނާ އިލްތިމާސް ކުރެއްވުމުން ޚާލިދާވަނީ އެކަމާ ދެކޮޅު ހައްދަވާފައެވެ.
ބަންގްލަދޭޝްގެ ޓީވީ ޗެނަލްތަކުން ވަގުތުން ދައްކާފައިވާ 40 މިނެޓުގެ ދިގު މިފޯން ކޯލަކީ އެއީ ހަސީނާއާއި އަދި ޒިޔާއާއި ދެމެދު ވަރަށް ޒަމާންތަކަކަށްފަހު ބޭއްވުނު ބައްދަލުވުމެކެވެ.
މިފޯންކޯލުގައި ހަސީނާވަނީ އިތުރަށް ކަންކަން ވިލަރެސް ކުރެއްވުމަށް ޒިޔާއަށް ފަރިއްކޮޅަކަށް ދަޢުވަތު ދެއްވާފައެވެ.
100000 މީހުންނަށް ވުރެ ގިނަ މީހުން ބައިވެރިވި މުޒާހަރާގައި ވާހަކަދައްކަވަމުން ޒިޔާ ވިދާޅުވިގޮތުގައި ބަންގްލަދޭޝްގެ މިހާރުގެ ސަރުކާރަކީ އެއީ ޣައިރުޤާނޫނީ ސަރުކާރެކެވެ.
ކިޔުންތެރިންގެ ހިޔާލު