އިސްލާމީ ޝަރީޢަތުގައި އައިސްފައިވާ ޙައްދުތަކާއި ޢުޤޫބާތްތައް ބުރުނާއީގައި ތަންފީޒް ކުރުމަށް ނިންމައިފި

ބުރުނާއީގެ ޤާނޫނީ ޢުޤޫބާތް އިޞްލާޙްކޮށް، ޢާލަމްތަކުގެ ވެރި ރައްބު، މާތް ﷲ މީސްތަކުންގެ މައްޗަށް ބާވައިލެއްވި ޝަރީޢަތުގައި އައިސްފައިވާ ޙައްދުތަކާއި ޢުޤޫބާތްތައް ބުރުނާއީގައި 6 މަސް ފަހުން ތަންފީޒްކުރަން ފަށާނެކަމަށް އެޤައުމުގެ ސުލްތާން، ޙަސަނުލް ބުލްޤިޔާ ހާމަކުރައްވައިފިއެވެ.

ސުލްތާން ޙަސަނުލް ބުލްޤިޔާއަށް ހަވާލާދީ އޭއެފްޕީއިން ބުނެފައިވާގޮތުގައި ޖިނާޢީ ކުށްތަކަށް އިސްލާމީ ޝަރީޢަތުގައި އައިސްފައިވާ ޙައްދުތަކާއި ޢުޤޫބާތްތައް ތަންފީޒްކުރެވޭނީ ހަމައެކަނި މުސްލިމުންނަށެވެ. އާބާދީގައި 420000 ވަރަކަށް މީހުންއުޅޭ، ތެލުގެ މުއްސަނދި މިޤައުމުގެ ގާތްގަނޑަކަށް ތިންބައިކުޅަ ދެބައިމީހުންނަކީ މުސްލިމުންނެވެ.

"މާތް ﷲ ގެ ރަޙްމަތުން، އެއިލާހު އިރާދަކުރެއްވިއްޔާ، އިސްލާމީ ޝަރީޢަތް ތަންފީޒްކުރެވެން ފެށުމުން، އަޅުގަނޑުމެން ﷲ އަށް އަދާކުރަން ޖެހޭ ވާޖިބު އަދާކުރެވިގެންދާނެ. އަދި ޝަރްޢީ ޢުޤޫބާތްތަކަކީ ހަމަކަށަވަރުން މާތް ﷲ ގެ ފަރާތުން އައިސްފައިވާ ޚާއްޞަ ހިދާޔަތެއް. އަދި މިކަން ވެގެންދާނީ ބުރުނާއީގެ ތާރީޚުގައި ފާހަގަކޮށް ލިޔެވިގެންދާނެކަމަކަށް،" ސުލްތާން ޙަސަނުލް ބުލްޤިޔާ ވިދާޅުވިއެވެ.

ބުރުނާއީގެ މުފްތީ އަވާންގް ޢަބްދުލްޢަޒީޒް މިކަމާ ގުޅިގެން ހާމަކުރެއްވި ގޮތުގައި، ޝަރްޢީ ޙުކުމްތައް ތަންފީޒް ކުރެވުމުން އެންމެންނަށް ރައްކާތެރިކަމާއި ސަލާމަތްތެރިކަން ލިބިގެންދާނެއެވެ.

"ހަމައެކަނި ބަލަންވީ އަތްކެނޑުމާއި ރަޖަމްކުރުމަކަށް ނޫން. އެޙުކުމްތައް ތަންފީޒްކުރެވޭ ޝަރުތުތަކާއި ޟަވާބިތުތަކަށް. އެއީ ހަމަ ހަމައެއްލަމައެއް ބެލުމެއް ނެތި އަތްކަނޑަނީ އެއް ނޫން. ރަޖަމް ކުރަނީއެއް ނޫން. ޢަދުލުވެރި އިންސާފްވެރި ޝަރުތުތަކެއްގެ ދަށުން އެކަން ކުރެވެނީ،" އޭނާ ހާމަކުރެއްވިއެވެ.

ޝަރްޢީ ޙައްދުތަކާއި ޢުޤޫބާތްތައް ތަންފީޒުކުރެވުމުން ބުރުނާއީއަށް ފަތުރުވެރިން ނައިސްދާނެކަމަށް އެއްވެސް ކަންބޮޑުވުމެއް އޮވެގެން ނުވާނެކަމަށް ޝައިޚް އަވަންގް ވިދާޅުވިއެވެ."އަޅުގަނޑުމެންގެ މިވާހަކަ ނިކަން އަޑުއައްސަވާ. ބައްލަވާ، ފަތުރުވެރިން ބުރުނާއީއަށް އަންނަނީ ވައްކަން ކުރަންތޯ؟ އެހެން ކަމަށް ނުވަނީނަމަ، ފަތުރުވެރިން ބިރުގަންނަންވީ ޖެހިލުންވާންވީ ކޮންކަމަކަށްތޯ؟،" ބުރުނާއީގެ މުފްތީ ހާމަކުރެއްވިއެވެ.

"ޤަބޫލުކުރައްވާ. ހަމަޔަޤީނުންވެސް، ޝަރްޢީ ޙައްދުތަކާއި ޢުޤޫބާތްތައް ތަންފީޒުކުރެވުމުން އޭގެ ފައިދާ އެންމެންނަށް ކުރާނެ. ފަތުރުވެރިންނަށްވެސް އޭރުން ރައްކާތެރިކަމާއި ސަލާމަތްތެރިކަން ލިބޭނެ،" އޭނާ އިތުރަށް ވިދާޅުވިއެވެ.