ބޯޑަރު ޑިފެންސް އެއްބަސް ވުމެއްގައި އިންޑާއާ އާއި ޗައިނާއިން ސޮއިކޮށްފި
24 އޮކްޓޯބަރ 2013 18:56
ބޯޑަރު ޑިފެންސް އެއްބަސްވުމެއްގައި އިންޑިއާއާއި ޗައިނާއިން ސޮއިކޮށްފިއެވެ. ބޭރުގެ ޚަބަރުފަތުރާ ވަސީލަތްތަކުން ހާމަކުރާގޮތުގައި މިއެއްބަސްވުމަކީ ދެޤައުމުގެ އަސްކަރިއްޔާގެ ގުޅުން ބަދަހިކުރުމަށް ވެފައިވާ އެއްބަސްވުމެކެވެ.
މިއެއްބަސްވުމުގައި ސޮއިކޮށްފައިވަނީ އިންޑިއާގެ ބޮޑު ވަޒީރު މަންމޯހަން ސިންގް ޗައިނާގެ ބެއިޖިންގްއަށް ދާދިފަހުން ކުރެއްވި ޒިޔާރަތުގައެވެ.
ޗައިނާގެ ޕްރިމިއަރ ލީ ކީކާންގް ހާމަކުރިގޮތުގައި ދެޤައުމުން ސޮއިކޮށްފައިވާ މިއެއްބަސްވުމުގެ ސަބަބުން ދެޤައުމުގެ އިންފާރު ރައްކާތެރިކަމާއި ސުލްހަވެރިކަމާއި އެކު ބެލެހެއްޓުމަށް އެހީތެރިވެދޭނެއެވެ.
ހިމާލަޔާގެ ބޯރޑަރުގެ މައްސަލާގައި ދެބަސްވުންތަކެއް އިންޑިއާއާއި ޗައިނާއާއި ދެމެދު އުޅޭއިރު ދެޤައުމުން ވަނީ މިމައްސަލާގައި 1962 ވަނަ އަހަރު ހަނގުރާމައެއްވެސް ކޮށްފައެވެ. މިމައްސަލާގައި ދޭތެރެ ދޭތެރެއިން ދެޤައުމުގެ ހާސްކަން ބޮޑުވެގެން ދެއެވެ. "ބޮޑުވަޒީރު ސިންގާއި އަދި އަޅުގަނޑުވެސް އެއްބަސްވަން ޗައިނާއާއި އިންޑިއާއާއި ދެމެދު ހުރި ޚިޔާލުތަފާތުވުމަށްވުރެ ދެޤައުމު އެއްބަސްވާ ކަންތައްތައް މާގިނަ ކަން،" ދެބޭފުޅުން އެކުގައި ބޭއްވެވި ނޫސްކޮންފަރެންސެއްގައި ލީ ހާމަކުރެއްވިއެވެ.
"ޗައިނާއާއި އިންޑިއާއަކީ ޤަދީމީ ދެ ޚަޟާރާތް. އަޅުގަނޑުމެން ދެޤައުމުގެ ރައްޔިތުންނަކީ ޙިކްމަތްވެރި ބައެއް. އަދި އަޅުގަނޑުމެން ދެޤައުމުގެ ސަރުކާރުންވެސް ބޯޑަރުގެ މައްސަލަ މެނޭޖްކުރުމުގެ ޤާބިލިއްޔަތުކަން އެބަހުރި،" ޗައިނާގެ ލީޑަރު ވިދާޅުވިއެވެ.
ކިޔުންތެރިންގެ ހިޔާލު