ބާސާއަށް ކުޅުންތެރިން ގަނެވޭނީ 2016 ގެ ފަހުން – ކޯޓް

ސްޕެއިންގެ މަޝްހޫރު ބާސެލޯނާއަށް ކުޅުންތެރިޔަކު ދެން ގަނެވޭނީ 2016 ގެ ފަހުންކަމަށް ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) އިން ހުކުމް ކޮށްފިއެވެ.

ސީއޭއެސްއިން މިގޮތަށް ހުކުމް ކުރީ، ފީފާގެ އުސޫލުތަކާ ހިލާފަށް 18 އަހަރުން ދަށުގެ ކުޅުންތެރިން ބާސާއަށް ގަނެފައިވާތީވެ 2016 ގެ ކުރިން ބާސާއަށް ކުޅުންތެރިޔަކު ނުގަނެވޭނެކަމަށް ފީފާއިން ނިންމި ނިންމުން އިސްތިއުނާފް ކުރުމަށް ސީއޭއެސްއަށް ބާސާއިން ހުށަހެޅުމުންނެވެ.

ސީއޭއެސްގެ ހުކުމްގައި ވަނީ ބާސާއަށް 18 ދަށުގެ ކުޅުންތެރިން ގަނެފައި ވަނީ ފީފާގެ އުސޫލުތަކާ ހިލާފަކަމަށް ސާބިތުވާކަމަށެވެ. ފީފާގެ ގަވައިދުގައިވާ ގޮތުން 18 އަހަރުން ދަށުގެ ކުޅުންތެރިޔަކު ގަންނަނަމަ، އެކުޅުންތެރިޔަކު ގަނެވޭނީ ފީފާގެ ހާއްސަ ހުއްދައެއްގެ ދަށުންނެވެ.

2016 ގެ ކުރިން ބާސާއަށް ކުޅުންތެރިން ނުގެނެވޭ ގޮތް ވުމަކީ ސްޕެނިޝް ލީގް ކާމިޔާބު ކުރުމަށާއި ޔުއެފާ ޗެމްޕިއަންސް ލީގް ކާމިޔާބު ކުރުމަށް ބާސާއަށް އެޅިގެންދާނެ ހުރަހެއްކަމަށް ތަޖުރިބާކާރުން ދެކެއެވެ.

ބާސާއަށް މިދިޔަ އޯގަސްޓްމަހުގެ ޓްރާންސްފާ މާކެޓުގައި ގެނެސްފައި ވަނީ ފޯވާޑް ލުއިސް ސްއަރޭޒް އާއި މިޑްފީލްޑަރު އިވާން ރަކިޓިކާއި ޑިފެންޑަރު ވާމެލަންއެވެ.

މިިދިޔަ ސީޒަން ހުސްއަތާ ނިންމާލި، ބާސާ ސްޕެނިޝް ލަލީގާގައި މިވަގުތު އޮތީ ވާދަވެރި ރެއާލް މެޑްރިޑަށްވުރެ އެއްމެޗް އިތުރަށް ކުޅެ އެއްޕޮއިންޓް ފަހަތުން ދެވަނައިގައެވެ.