އެންމެ މޮޅު ކުޅުންތެރިޔަކީ ރޮނާލްޑޯ، އެންމެ މޮޅު ޓީމަކީ ރެއާލް މެޑްރިޑް

ގްލޯބް ސޮކާއިން މިއަހަރު ހޮވިި އެންމެ މޮޅު ފުޓްބޯޅަ ކުޅުންތެރިޔާގެ މަގާމް ރެއާލް މެޑްރިޑް ތަރި ކްރިސްޓިއާނޯ ރޮނާލްޑޯ ހޯދައިފިއެވެ.

އެންމެ މޮޅު ކުޅުންތެރިޔާގެ އިތުރުން ރޮނާލްޑޯ ވަނީ ސަޕޯޓަރުންގެ ފެވަރީޓް ކުޅުންތެރިޔާގެ އެވޯޑްވެސް ހޯދާފައެވެ. އެންމެ މޮޅު ޓީމަކަށް ހޮވުނީ ރެއާލް މެޑްރިޑެވެ. ރެއާލް މެޑްރިޑް ވަނީ ޔުއެފާ ޗެމްޕިއަންސް ލީގާއި ޔުރޮޕާ ލީގާއި ކްލަބު ވޯލްޑް ކަޕާއި ކޮޕާ ޑެލްރޭގެ ޗެމްޕިއަންކަން މިއަހަރު ހޯދާފައެވެ. މިމުބާރާތްތައް ރެއާލްއަށް ކާމިޔާބު ކޮށްދިނުމުގައި ރޮނާލްޑޯ ވަނީ މޮޅު ކުޅުމެއް ދައްކައި ގިނަ ލަނޑުތަކެއް ކާމިޔާބު ކޮށްފައެވެ.

ރޮނާލްޑޯ ބުނީ މިއެވޯޑަކީ ފީފާގެ މޮޅު ކުޅުންތެރިޔާގެ މަގާމް ލިބޭނެކަމުގެ ސިގްނަލެއްކަމަށެވެ. "އެކަމަކު އަހަރެން ފީފާގެ އެވޯޑާމެދު އަދި ނުވިސްނަން" ދުބާއީގައި ޗުއްޓީ ހޭދަކުރަމުން އަންނަ ރޮނާލްޑޯ ބުންޏެވެ.

އެންމެ މޮޅު ކޯޗްގެ މަގާމް ހޯދީ ރެއާލް މެޑްރިޑަށް ހަތަރު ތަށި މިއަހަރު ކާމިޔާބުކޮށްދިން ކާމިޔާބު ކޯޗް ކާލޯ އެންޗެލޮއްޓީއެވެ. އެންމެ މޮޅު މޮޅު ޒުވާން ކުޅުންތެރިޔާގެ އެވޯޑް ހޯދީ ރެއާލް މެޑްރިޑަށް ކުޅެމުން އަންނަ ކޮލަމްބިއާގެ ފޯވާޑް ޖޭމްސް ރޮޑްރިގޭޒްއަށެވެ. ކެރިޔަރ އެވޯޑް ލިބުނީ އޭސީމިލާނާއި އިޓަލީ ގައުމީ ޓީމުގެ ކުރީގެ ފޯވާޑް އަދި މިހާރު އޭސީ މިލާނުގެ ކޯޗްކަން ކުރަމުން އަންނަ ފިލިޕޯ އިންޒާގީއަށެވެ.އެންމެ މޮޅު ރައީސަކަށް ހޮވުނީ ރެއާލްގެ ރައީސް ފްލޮރެންޓީނޯ ޕެރޭޒްއެވެ.

އެންމެ މޮޅު އެޖެންޓުގެ އެވޯޑް ލިބުނީ ޕޯޗުގަލްގެ މަޝްހޫރު އެޖެންޓް ޖޯޖް މެންޑެޒްއަށެވެ. "ސުޕަ އެޖެންޓް" ގެ ނަމުން މަޝްހޫރު މެންޑެޒްއަކީ ރޮނާލްޑޯ އާއި އެންހެލް ޑިމާރިއާ ޑޭވިޑް ޑެހާއީ އާއި ވިކްޓަރ ވަލްޑޭޒް އާއި ޖޭމްސް ރޮޑްރިގޭޒްގެ އެޖެންޓެވެ. މީގެއިތުރުން މަޝްހޫރު ކޯޗް ހޯސޭ މޮރިނިއޯ އާއި ލުއިޒް ފެލިޕް ސްކޮލާރީގެ އެޖެންޓަކީވެސް މެންޑެޒްއެވެ. މިއީ އެންމެ މޮޅު އެޖެންޓުގެ މަގާމް މެންޑެޒް ހޯދި ތިންވަނަ ފަހަރުކަން ފާހަގަ ކޮށްލެވެއެވެ.