ކުރިއަށް އޮތް އަހަރު ހުރިހާ ތައްޓެއް ކާމިޔާބު ކުރެވިދާނެ- ރޮނާލްޑޯ

ކުރިއަށް އޮތް 2015 ވަނަ އަހަރު ރެއާލް މެޑްރިޑަށް ހުރިހާ މުބާރާތެއް ކާމިޔާބު ކުރެވިދާނެކަމަށް އެކްލަބުގެ ތަރި ކްރިސްޓިއާނޯ ރޮނާލްޑޯ ބުނެފިއެވެ.

"ހަތަރު މުބާރާތުގެ ތެރެއިން އެންމެ މުބާރާތެއް ކާމިޔާބު ކުރުމަކީވެސް ވަރަށް އުނދަގޫކަމެއް. އެންމެ މުބާރާތެއް ކާމިޔާބު ކުރަން ފުރުސަތު ލިބިއްޖެނަމަ އަހަރެން އިހްތިޔާރު ކުރަނީ ޗެމްޕިއަންސް ލީގް. އެކަމަކު ބާކީ ހުރި މުބާރާތްތަކީވެސް މުހިއްމު މުބާރާތްތަކެއް" ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމުގައި ހުރި ރޮނާލްޑޯ ބުންޏެވެ.

"އަހަރެންގެ އުއްމީދަކީ ކުރިއަށް އޮތް އަހަރަކީ މިއަހަރަށްވުރެ ކާމިޔާބު އަހަރެއް ކަމުގައިވުން. ކުރިއަށް އޮތް އަހަރު ހުރިހާ މުބާރާތްތަކެއް ކާމިޔާބު ކުރެވޭނެ ހިތްވަރާއި ރޫހު ރެއާލް ކިބައިގައި އެބަހުރި" މިވަގުތު ދުބާއީގައި ޗުއްޓީ ހޭދަކުރަމުން އަންނަ ރޮނާލްޑޯ ބުންޏެވެ.

މީގެ އިތުރުން ރޮނާލްޑޯ ވަނީ ރެއާލްގެ ކޯޗް ކާލޯ އެންޗެލޮއްޓީއަށް ވަރަށް ބޮޑަށް ތައުރީފް ކޮށްފައެވެ. "އޭނާއަކީ މޮޅު ކޯޗެއް އަދި ވަރުގަދަ ޝަހްސިއްޔަތެއް. އަހަރެމެން އެންމެން އޭނާއާ ގަޔާވޭ. އަހަރެމެންނަކީ އެކުވެރި އާއިލާއެއް. މިގޮތުގައި އަހަރެމެން މަސައްކަތް ކުރާނީ 2014 ވަނަ އަހަރަށްވުރެ ބޮޑު ކާމިޔާބެއް ހޯދުމަށް" ނިމިގެންދިޔަ ސީޒަނުގައި ޔޫރަޕުގެ ރަން ބޫޓްވެސް ކާމިޔާބު ކުރި ރޮނާލްޑޯ ބުންޏެވެ.

15/2014 ސީޒަނުގައި މިހާތަނަށް 25 މެޗުން 32 ލަނޑު ކާމިޔާބު ކޮށްފައިވާ ރޮނާލްޑޯ ވަނީ ނިމިގެންދިޔަ ސީޒަނުގައި ރެއާލް މެޑްރިޑަށް ޗެމްޕިއަންސް ލީގް ކާމިޔާބު ކޮށްދިނުމަށް މުހިއްމު ދަރެއް އާދަކޮށްފައެވެ. މިސީޒަނުގައި ޔުއެފާ ސްޕަރ ކަޕާއި ކްލަބު ވޯލްޑް ކަޕް ރެއާލްއިން ކާމިޔާބު ކުރީވެސް ރޮނާލްޑޯގެ އެހީތެރިކަމާއެކުއެވެ.