މެސީ އާއި ރޮނާލްޑޯފަދަ މޮޅު ކުޅުންތެރިޔަކަށް ނުވެވިދާނެ – ނޭމާ
27 ޑިސެމްބަރ 2014 15:35
މެސީ އާއި ރޮނާލްޑޯ އަދި ނޭމާ
ލިއޮނަލް މެސީ އާއި ކްރިސްޓިއާނޯ ރޮނާލްޑޯފަދަ މޮޅު ކުޅުންތެރިޔަަކަށް ނުވެވިދާނެކަމަށް ބްރެޒިލްގެ އުއްމީދީ ފޯވާޑް ނޭމާ ބުނެފިއެވެ.
" މެސީ އާއި ރޮނާލްޑޯއަކީ މިވަގުތު ދުނިޔޭގައި ތިބި އެންމެ މޮޅު ދެކުޅުންތެރިން. އަހަންނަށް އެދެކުޅުންތެރިންނާ އެއްހަމައަށް ދެވިދާނެކަމަށް ބުނާކަށް ނޭނގޭ. އެކަމަކު އަހަރެންގެ އަޒުމަކީ ކޮންމެ ދުވަހަކުވެސް އިތުރު ހުނަރުތަކެއް ދަސްކުރުން. އަހަރެން ވާދަކުރަނީ އަހަރެންގެ އަމިއްލަ ނަފުސާ" ނޭމާ،22، ބުންޏެވެ
ބްރެޒިލްގެ ގައުމީ ޓީމުގެ ކެޕްޓަންކަންވެސް ކުރަމުން އަންނަ ނޭމާއަކީ މެސީ އާއި ރޮނާލްޑޯއާ އެއްފެންވަރަށް ދެވިދާނެ ކުޅުންތެރިއެއްކަމަށް ބްރެޒިލްގެ ފުޓްބޯޅަ ޝަހްސިއްޔަތު ޕެލޭ އާއި ރޮނާލްޑޯ ވަނީ ބުނެފައެވެ. އަދި ކުރިއަށް އޮތްތަނުގައި ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމަށް މެސީ އާއި ރޮނާލްޑޯއާ ވާދަކުރާނެ ކުޅުންތެރިޔަކީ ނޭމާކަމަށް ފުޓްބޯޅައިގެ ތަޖުރިބާކާރު ބައެއް ފަރާތްތަކުން ވަނީ ބުނެފައެވެ.
ނޭމާ ބުނީ ކޮންމެ ކަމެއްވެސް ތަރައްގީވެ ކުރިއަރަން ވަގުތު ބޭނުންވާނެކަމަށެވެ. "ކޮންމެ ކަމަކަށްވެސް ވަގުތު ބޭނުންވާނެ. ކުޅުންތެރިއެއްގެ ގޮތުގައި ދުވަހަކަށްވުރެ ދުވަހެއް އަހަރެން މިދަނީ ކުރި އަރަމުން. ބާސެލޯނާއާ ގުޅި ޔޫރަޕުގެ ފުޓްބޯޅަ ތަޖުރިބާ ކުރެވުމަކީވެސް ވަރަށް ބޮޑު ތަޖުރިބާއެއް. ސަންތޯސް (ކުރީގެ ކްލަބު) ގައި އަހަރެން ހުރީ އުފަލުން. އެކަމަކު އަހަރެން ބޭނުންވީ އާގޮންޖެހުމަކާ ކުރިމަތިލުމަށް. މިގޮންޖެހުމާއެކު އުފަލުގައި ހުރުމަށް މަސައްކަތް ކުރާނަން" ނޭމާ ބުންޏެވެ.
ނޭމާ ވަނީ މިސީޒަނުގައި މިހާތަނަށް ސްޕެނިޝް ލަލީގާގައި ބާސެލޯނާއަށް ކުޅެދިން 18 މެޗުގައި 14 ލަނޑު ކާމިޔާބު ކޮށްފައެވެ.
ކިޔުންތެރިންގެ ހިޔާލު