ސްއަރޭޒް ހަތަރު މަހަށް ސަސްޕެންޑް ކޮށްފި

އިޓަލީގެ ޑިފެންޑަރު ޖިއޮޖިއޯޗިއެލިނީގެ ކޮނޑުގައި ދަތް އަޅާފައިވާތީ ފީފާއިން އުރުގުއޭގެ ނުރައްކާތެރި ފޯވާޑްލުއިސް ސްއަރޭޒް ފުޓްބޯޅައިގެ އެންމެހައި ހަރަކާތްތަކުން ހަތަރު މަހަށް އަދިބައިނަލްއަގުވާމީ ނުވަ މެޗަށް ސަސްޕެންޑް ކޮށްފިއެވެ.

ޗިއެލިނީގެ ކޮނޑުގައި ސްއަރޭޒް ދަތްއަޅާފައި ވަނީ ބްރެޒިލްގައި މިހާރު ކުރިއަށްދާ ވޯލްޑް ކަޕުގައި ގްރޫޕް ސްޓޭޖް"ޖީ" އިޓަލީ އާއި އުރުގުއޭ ބައްދަލު ކުރި މެޗުގެ ދެވަނަ ހާފުގައެވެ.  ސަސްޕެންޝަނުގެ އިތުރުން ފީފާއިން ވަނީ 65،680 ޕައުންޑުން ޖޫރިމަނާވެސް ކޮށްފައެވެ.

މި ސަސްޕެންޝަނުގެ ސަބަބުން މިފަހަރުގެ ވޯލްޑުގެ އެއްވެސް މެޗެއްގައި ސްއަރޭޒަށް ދެން ނުކުޅެވޭނެއެވެ. މިއީ އުރުގުއޭއަށް ފޫބެއްދޭ ވަރަށްވުރެ ބޮޑު ގެއްލުމެއް ކަމަށް ތަޖުރިބާކާރުން ދެކެއެވެ. މީގެއިތުރުން ސްއަރޭޒް ކުޅެމުން އަންނަ ލިވަޕޫލްގެ ހަރަކާތްތަކުގައިވެސް އޭނާއަށް ބައިވެރިއެއް ނުވެވޭނެއެވެ.

ގްރޫޕް ސްޓޭޖް ފުރަތަމަމެޗުގައި 3-1 އިން ކޮސްޓަރިކާ އަތުން ބަލިވެ ގްރޫޕް ސްޓޭޖުން ކެޓުމުގެ ބިރުކުރިމަތިވެފައި ވަނިކޮށް، ދެވަނަ މެޗުގައި އިންގްލެންޑް އަތުން އުރުގުއޭ 2-1 އިންމޮޅު ކޮށްދިނީ ސްއަރޭޒެވެ. މީގެ މަހެއްހައި ދުވަސް ކުރިން ކަކުލުގެ އޮޕަރޭޝަނެއްކުރި ސްއަރޭޒް މިފަހަރުގެ ވޯލްޑް ކަޕުގައި ކުޅެފައި ވަނީ މުޅިން ފިޓްނުވެހުއްޓައެވެ.

އުރުގުއޭ ފުޓްބޯޅަ ފެޑެރޭޝަނުންބުނެފައި ވަނީ ސްއަރޭޒަށް ދިން އަދަބު މާބޮޑުކަމަށާއި އަދަބު ލުއިކޮށްދިނުމަށްއެދި ފީފާއަށް ހުށަހަޅާނެކަމަށެވެ.

މިއީ ވޯލްޑް ކަޕުގެ ތާރިހުގައި މިހާތަނަށް ކުޅުންތެރިޔަކަށް ދިން އެންމެބޮޑު އަދަބެވެ.