މެސީއަށް ބަރޯސާނުވެ ނަތީޖާ ނެރެން ދަސްކުރަން ޖެހޭ – ކޯޗް

އާޖެންޓީނާ ކުޅުންތެރިން އިދިކޮޅު ޓީމު ބަލި ކުރުމަށްޓަކައި ކެޕްޓަން އަދި ނުރައްކާތެރި ފޯވާޑް ލިއޮނަލް މެސީއަށް ބަރޯސާ ވަނީ މާބޮޑަށްކަމަށާއި އެކަން ބަދަލު ކުރަންޖެހޭކަމަށް ކޯޗް އަލްހެންދްރޯ ސަބެއްލާ ބުނެފިއެވެ.

ސަބެއްލާ މިހެން ބުނެފައި ވަނީ ގްރޫޕް "އެފް" ގެ ފަހު މެޗުގައި މިރޭ ނައިޖީރިޔާއާ ދެކޮޅަށް ނުކުތުމުގެ ކުރިންނެވެ. ސަބެއްލާ ބުނީ މެސީފަދަ ހުނަރުވެރި ކުޅުންތެރިޔަކު ހުރިނަމަ ކޮންމެ ޓީމަކުންވެސް އެކުޅުންތެރިޔަކަށް މާބޮޑަށް ބަރޯސާ ވެވޭނެކަމަށެވެ. "އެކަމަކު މެސީ އާއި ނުލައި ނަތީޖާ ދަސްކުރަން ޖެހޭ" ސަބެއްލާ ބުންޏެވެ.

ކްލަބު ލެވެލްގައި ދައްކާ މޮޅު ކުޅުން ގައުމީ ޓީމުގައި މެސީއަށް ނުދެއްކޭ ކަމަށް ބުނެކުރިން ބައެއް މީޑިޔާތަކުން އޭނާއަށް ފާޑުކީނަމަވެސް މިފަހަރުގެ ވޯލްޑް ކަޕުގައި މިހާތަނަށް އާޖެންޓީނާ ކުޅުނު ދެމެޗުންވެސް އެޓީމު މޮޅު ކޮށްދިނީ މެސީއެވެ. އަދި ގައުމީ ޓީމަށް އެންމެފަހުން ކުޅުނު 22 މެޗުގައި މެސީ ވަނީ 22 ލަނޑު ކާމިޔާބު ކޮށްފައެވެ.

"އަހަރެމެން މަސައްކަތް މިކުރަނީ ޓީމު މޮޅު ކޮށްދިނުމުގައި މެސީއަށް ބަރޯސާވެވޭވަރު ކުޑު ކުރުމަށް. އަދި ޓީމު މޮޅުކޮށް ދިނުމަށް މެސީ އޮންނަ ޕްރެޝަރ ކުޑަ ކުރެވޭތޯ" ސަބެއްލާ ބުންޏެވެ.'

ސަބެއްލާ ބުނީ ގްރޫޕް ސްޓޭޖުގައި މިހާތަނަށް ކުޅުނު ދެމެޗުގައި އެޓީމުގެ އެންމެ މޮޅު ކުޅުން ނުދެއްކޭ ކަމަށް ގަބޫލް ކުރާކަމަށެވެ. "ޖާގަ ހޯދައިގެން އިދިކޮޅު ޓީމަށް މިހާރަށްވުރެ ބޮޑަށް އަހަރެމެންނަށް ނުރައްކާ ކުރެވޭނެ. ޓީމުގެ ފަރާތުން ކުރިއެރުން ތަކެއް ފެންނާނެ ކަމަށް ގަބޫލް ކުރަން" 2010 ވަނަ އަހަރު އާޖެންޓީނާ ގައުމީ ޓީމާ ހަވާލުވި ސަބެއްލާ ބުންޏެވެ.

މިރޭ ނައިޖީރިޔާއާ ދެކޮޅަށް ކުޅެންޖެހޭ މެޗާ ގުޅޭ ގޮތަށް ސަބެއްލާ ބުނީ ފަހުގެ ތާރިހުގައި ނައިޖީރިޔާ އަތުން އާޖެންޓީނާ މޮޅުވީ ސެޓްޕީސްތަކުން ޖެހި ލަނޑުންކަމަށެވެ. "ނައިޖީރިޔާއާ ދެކޮޅަށް ކުޅުމަކީ އަބަދުވެސް އާޖެންޓިނާއަށް އުނދަގޫކަމެއް. އެންމެފަހުން ނައިޖީރިޔާއާ ދެކޮޅަށް ކުޅުނު މެޗުތައްވެސް ކާމިޔާބު ކުރެވިފައި ވަނީ ސެޓްޕީސްތަކުން" ސަބެއްލާ ބުންޏެވެ.

ނައިޖީރިޔާގެ ކޯޗް ސްޓެފަން ކެޝީ ބުނީ އާޖެންޓީނާއާ ދެކޮޅަށް ކުޅޭނީ އެޓީމުގެ ބަލިފައިތަކުން ފައިދާ ނެގޭނެ ގޮތަށްކަމަށެވެ. "ބޮސްނިޔާ އާއި އިރާނާ ދެކޮޅަށް އާޖެންޓީނާ ކުޅުނު އަހަރެމެން ދިރާސާ ކުރިން. އާޖެންޓީނާގެ ބަލިފައިތަށް އަހަރެމެންނަށް އެނގޭ. އޭގެ ފައިދާ ނަގަން މަސައްކަތް ކުރާނަން" ކެޝީ ބުންޏެވެ.

ހަ ޕޮއިންޓާއެކު ދެވަނަ ބުރުގެ ޖާގަ އާޖެންޓީނާއަށް މިހާރުވެސ ޔަގީންވެފައި ވާއިރު މިމެޗް އެއްވަރު ކޮށްލައިގެން ނައިޖީރިޔާއަށް ދެވަނަ ބުރުގެ ޖާގަ ކަށަވަރު ކުރެވޭނެއެވެ. ދެވަނައިގައި ނައިޖީރިޔާ އޮތީ 4 ޕޮއިންޓާއެކުއެވެ.

މިގްރޫޕުގައި މިރޭ އިރާނާއި ބޮސްނިޔާވެސް ވާދަ ކުރާނެއެވެ. ދެވަނަ ބުރުގެ ފުރުސަތު ބޮސްނިޔާއަށް ގެއްލިފައިވާއިރު އިރާނަށް ދެވަނަ ބުރުން ޖާގަ ހޯދުމުގެ އަމިއްލަ ބާރު ވަނީ ގެއްލިފައެވެ.

އާޖެންޓީނާ އާއި ނައިޖީރިޔާ ބައްދަލު ކުރާ މެޗް އަދި އިރާނާއި ބޮސްނިޔާ ބައްދަލު ކުރާ މެޗް ފަށާނީ މިރޭ ރާއްޖޭ ގަޑިން 21:00 ގައެވެ. ވޯލްޑް ކަޕުގައި މިރޭ ދަންވަރުވެސް ދެމެޗް ކުޅޭނެއެވެ. އެއީ ފްރާންސާއި އިކްއެޑޯ އަދި ސްވިޓްޒަލޭންޑާއި ހޮންޑިއުރަސް ބައްދަލު ކުރަން ޖެހޭ މެޗެވެ. މިދެމެޗްވެސް ފަށާނީ މިރޭ ރާއްޖޭ ގަޑިން ދަންވަރު 1:00 ގައެވެ.