އިޓަލީގެ ކޯޗްކަމުގެ މަގާމުން ޕްރަންޑެއްލީ އިސްތިއުފާ ދީފި

އުރުގުއޭ އަތުން 1-0 އިން ބަލިވެ އިޓަލީ ވޯލްޑް ކަޕުގެ ގްރޫޕް ސްޓޭޖުން ކެޓުމުން، އިޓަލީގެ ކޯޗްކަމުގެ މަގާމުން ސެސަރ ޕްރަންޑެއްލީ އިސްތިއުފާ ދީފިއެވެ.

ޕްރަންޑެއްލީ ބުނީ ގްރޫޕް ސްޓޭޖުން ކެޓުމަކީ އޭނާއަށް ގަބޫލް ކުރެވޭވަރަށްވުރެ ދަށް ނަތީޖާއެއްކަމަށާއި ކޯޗްކަމުގައި އިތުރަށް ދެމިހުރުން ހައްގު ނޫންކަމަށެވެ. "އިޓަލީގެ ކޯޗްކަމުގައި އިތުރަށް ދެމިހުރުން އަހަންނަށް ހައްގެއް ނޫން. މިއީ މަގާމް ދޫކޮށްލަން ޖެހޭ ވަގުތުކަމަށް ގަބޫލް ކުރަން" ޕްރަންޑެއްލީ ބުންޏެވެ.

އިޓަލީގެ ކޯޗްކަމުގެ މަގާމާ ޕްރަންޑެއްލީ ހަވާލުވީ 2010 ގެ ވޯލްޑް ކަޕް ގްރޫޕް ސްޓޭޖުން އިޓަލީ ކެޓުމުން އޭރު ކޯޗަކަށްހުރި މާސެލޯ ލިއްޕީ ކޯޗްކަމުން އިސްތިއުފާ ދިނުމުންނެވެ. ޕްރަންޑެއްލީގެ އިރުޝާދުގެ ދަށުން އިޓަލީ ވަނީ ޔޫރޯ 2012 ގެ ފައިނަލުގައި ކުޅެފައެވެ. ފައިނަލުގައި އިޓަލީ ބަލިވީ ސްޕެއިން އަތުން 4-0 އިންނެވެ.