ކެމަރޫން ބަލިކޮށް ގްރޫޕުގެ އެއްވަނަ ބްރެޒިލް ހޯދައިފި

ކެމަރޫން 1-4 އިން ބަލިކޮށް ގްރޫޕް "އޭ" ގެ އެއްވަނަ ޓީމުގެ ގޮތުގައި ބްރެޒިލް ދެވަނަ ބުރުން ޖާގަ ހޯދައިފިއެވެ.

ބްރެޒިލްގެ އެސްޓާޑިއޯ ޑިނެޝަނަލް ބްރެޒިލިއާގައި 69،000 ސަޕޯޓަރުންގެ ކުރިމަތީގައި ކެމަރޫން ކޮޅަށް ބްރެޒިލުން ޖެހި ހަތަރު ލަނޑުގެ ތެރެއިން ދެ ލަނޑު ކާމިޔާބު ކޮށްދިނީ މެޗުގެ މޮޅު ކުޅުންތެރިޔާގެ މަގާމް ހޯދި މަޝްހޫރު ފޯވާޑް ނޭމާއެވެ. އަނެއް ދެލަނޑު ކާމިޔާބު ކޮށްދިނީ ފޯވާޑް ފްރެޑާއި މިޑްފީލްޑަރު ފެނާންޑިންހޯއެވެ. ކެމަރޫންގެ ހަމައެކަނި ލަނޑު ކާމިޔާބު ކޮށްދިނީ ޖޮއެލް މަޓިޕެވެ. މިއީ ވޯލްޑް ކަޕުގައި ބްރެޒިލް ކުޅުނު 100 ވަނަ މެޗެވެ.

މި ނަތީޖާއެކު ބްރެޒިލަށް ގްރޫޕުގެ އެއްވަނަ ލިބުނީ 7 ޕޮއިންޓާއި ފައިދާ 5 ލަނޑާ އެކުއެވެ.

މި ގްރޫޕުގެ ދެ ވަނަ ޓީމުގެ ގޮތުގައި ދެވަނަ ބުރުން ޖާގަ ހޯދީ މެކްސިކޯއެވެ. ކްރޭޝިޔާ ބަލިކުރީ 3-1 ނަތީޖާއަކުންނެވެ. ކްރޭޝިޔާ ކޮޅަށް މެކްސިކޯގެ ލަނޑުތައް ކާމިޔާބު ކޮށްދިނީ ކެޕްޓަން ރަފޭލް މާކްއޭޒް، އަންދްރޭސް ގުއާޑަޑޯ އާއި ހާވިޔާ ހެނާންޑޭޒް (ޗިޗަރީޓޯ) އެވެ. ޕޮއިންޓުގެ ގޮތުން ބްރެޒިލާއި އެއްވަރުވި ނަމަވެސް މެކްސިކޯއަށް ދެ ވަނަ ލިބުނީ ފައިދާ ލަނޑުގެ ތަފާތުންނެވެ. މެކްސިކޯއަށް އޮތީ ފައިދާ 3 ލަނޑެވެ.

ދެވަނަ ބުރުގައި ބްރެޒިލް ބައްދަލު ކުރަންޖެހޭނީ ޗިލީއާއެވެ. މެކްސިކޯ ނިކުންނާނީ ވަރުގަދަ ހޮލެންޑާ ދެކޮޅަށެވެ.