ރަޝިޔާ ބަލިކޮށް ބެލްޖިއަމް ދެވަނަ ބުރުން ޖާގަ ހޯދައިފި

ސިޔާސީ މައިދާނުގައި ވާދަވެރި ރަޝިޔާ 1-0 އިން ބަލިކޮށް ވޯލްޑް ކަޕުގެ ދެވަނަ ބުރުން ބެލްޖިއަމް މިރޭ ޖާގަ ހޯދައިފިއެވެ.

ބެލްޖިއަމްގެ ފަރާތުން އެޓޭކިންގ ގޭމެއް ފެނިގެންދިޔަ މިމެޗުގައި ފެނިގެންދިޔަ ހަމައެކަނި ލަނޑު މެޗުގެ 88 ވަނަ މިނެޓުގައި ކާމިޔާބު ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް އުމުރުން އެންމެ 19 އަހަރުގެ ފޯވާޑް ޑިވޮކް އޮރިޖީއެވެ. މިއީ ބެލްޖިއަމް ގައުމީ ޓީމަށް އޭނާ ކާމިޔާބު ކޮށްދިން ފުރަތަމަ ލަނޑެވެ.

މިމެޗުގެ ފުރަތަމަ ހާފުގައި ބެލްޖިއަމް އާއި ރަޝިޔާއަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ. މީގެ ތެރެއިންވެސް އެންމެ ބޮޑަށް ފާހަގަ ކޮށްލެވެނީ ބެލްޖިއަމްގެ ކެޕްޓަން އަދި އިތުބާރު ޑިފެންޑަރު ވިސެންޓް ކޮމްޕެނީއަށް ލިބުނު ފުރުސަތެވެ.

ދެވަނަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު ބެލްޖިއަމްއިން އުފެއްދި ހަމަލާތަކުގައި ވިންގަރ އެޑިން ހަޒާޑް ހުއްޓުވުމުގައި ރަޝިޔާގެ ޑިފެންޑަރުން ނާކާމިޔާބުވިތަން ފެނިގެންދިޔައެވެ. ބެލްޖިއަމްއިން ކާމިޔާބު ކުރި ލަނޑަކީވެސް ރަޝިޔާގެ ބޮޑު އޭރިޔާގެ ބެރު އަރިމަތިން ތިން ޑިފެންޑަރުން ކައިރިން ދެމިގަތުމަށްފަހު ހަޒާޑް ތަނަވަސްކޮށްދިން ފުރުސަތަކުން ކާމިޔާބު ކުރި ލަނޑެކެވެ.

ބެލްޖިއަމްގެ ކޯޗް މާކް ވިލްމޮޓްސް ވަނީ މެޗުން ތިން ޕޮއިންޓް ހޯދުމަށް ކުޅުންތެރިން ދެއްކި ހިތްވަރަށް ތައުރީފްކޮށްފައެވެ. "މިއީ ކުޅުންތެރިން ވަރަށް ބުރަ މަސައްކަތުން ހޯދި ތިން ޕޮއިންޓް. މެޗް ކާމިޔާބު ކުރުމަށް ކުޅުންތެރިން ދެއްކި ކުޅުމަށް ސާބަސް ދެން" ވިލްމޮޓްސް ބުންޏެވެ.

ރަޝިޔާގެ ކޯޗް ފަބިއޯ ކަޕެއްލޯ ބުނީ މޮޅުވުމަށްޓަކައި ކުރަންޖެހޭ ވަރަށް ރަޝިޔާ ކުޅުންތެރިން މަސައްކަތް ނުކުރާކަމަށެވެ. "ފުރަތަމަ ހާފުގައި ދެއްކި ކުޅުމާމެދު ހިތްހަމަ ޖެހޭ. އެކަމަކު ދެވަނަ ހާފުގައި މެޗް ކާމިޔާބު ކުރުމަށް ކުޅުންތެރިން ކުރަންޖެހޭ ވަރަށް މަސައްކަތެއް ނުކުރޭ" އެންމެފަހުގެ ވޯލްޑް ކަޕުގައި އިންގްލެންޑަށް އިރުޝާދުދިން މަޝްހޫރު ކޯޗް ކަޕެއްލޯ ބުންޏެވެ.

މިމޮޅާއެކު ބެލްޖިއަމް ދެވަނަ ބުރުން ޖާގަ ކަށަވަރު ކުރީ ގްރޫޕް ސްޓޭޖުގައި މިހާތަނަށް ކުޅުނު ދެމެޗް ކާމިޔާބުކޮށް 6 ޕޮއިންޓާއި ފައިދާ ދެލަނޑާއެކުއެވެ. މިގްރޫޕުގައި މިރޭ ދަންވަރު ދެކުނު ކޮރެއާ އާއި އަލްޖީރިއާ ބައްދަލު ކުރާ މެޗުން ކޮންމެ ގައުމެއް 3 ޕޮއިންޓް ހޯދިޔަސް ދެވަނަ ބުރުން ޖާގަ ހޯދުމުގެ އަމިއްލަ ބާރު ރަޝިޔާއަށް ގެއްލޭނެއެވެ.

2006 އަދި 2010 ގެ ވޯލްޑް ކަޕަށް ބެލްޖިއަމް ކޮލިފައިވެފައި ނުވާއިރު 2002 ގެ ވޯލްޑް ކަޕުގެ ދެވަނަ ބުރުން ބެލްޖިއަމް ކެޓީ ބްރެޒިލް އަތުން 2-0 އިން ބަލިވުމުންނެވެ.

2002 ގެ ވޯލްޑް ކަޕުގައިވެސް ބެލްޖިއަމް އާއި ރަޝިޔާ ލައްވާލީ އެއްގްރޫޕެއްގައެވެ. އެފަހަރު ރަޝިޔާގެ މައްޗަށް ބެލްޖިއަމް ކުރި ހޯދީ ވަރަށް ވާދަވެރި ކުޅުމަކަށްފަހު 2-3 އިންނެވެ.