ވޯލްޑް ކަޕް ގްރޫޕް ސްޓޭޖުން ބޮސްނިޔާ ކަޓައިފި

ވޯލްޑް ކަޕް ގްރޫޕް "އެފް" ގައި ނައިޖީރިއާ އަތުން 1-0 އިން ބަލިވެ ގްރޫޕް ސްޓޭޖުން ބޮސްނިޔާ ކަޓައިފިއެވެ.

މެންޗެސްޓަރ ސިޓީގެ މަޝްހޫރު ފޯވާޑް އެޑިން ޒެކޯ ވެސް ކުޅެމުންދާ ބޮސްނިޔާ ކޮޅަށް ނައިޖީރިއާއިން ލަނޑު ޖެހީ މެޗުގެ 29 ވަނަ މިނެޓުގައި ޕީޓަރ އޮޑެމް ވިންގީއެވެ. ގޯލަށް އަމާޒުކޮށް ބޮސްނިޔާއިން 10 ހަމަލާ ފޮނުވާލި އިރު ނައިޖީރިޔާއިން ވަނީ 13 ހަމަލާ ފޮނުވާލާފައެވެ.

މިމެޗުން ބަލިވުމުން ބޮސްނިޔާ ގްރޫޕް ސްޓޭޖުން ކެޓީ، ގްރޫޕް ސްޓޭޖް ފަހު މެޗް ކާމިޔާބު ކޮށްގެން ވެސް 4 ޕޮއިންޓް ހަމަނު ކުރެވޭނެތީ އެވެ. ބޮސްނިޔާ އާއި އިރާން ބަލިކޮށް 6 ޕޮއިންޓް ހޯދައި އާޖެންޓީނާ ދެވަނަ ބުރުގެ ޖާގައެއް ކަށަވަރު ކޮށްފައިވާ އިރު ނައިޖީރީއަށް ވަނީހަތަރު ޕޮއިންޓް ލިބިފައެވެ.

މިގްރޫޕުން ދެވަނަ ބުރުން ޖާގަ ހޯދުމުގެ ފުރުސަތުމިހާރު އޮތީ ނައިޖީރިއާގެ އިތުރުން އިރާނަށެވެ. ނައިޖީރިޔާ 4 ޕޮއިންޓާ އެކު ގްރޫޕުގެ ދެވަނައިގައި އޮތްއިރު ތިންވަނައިގައި އިރާން އޮތީ 1 ޕޮއިންޓާ އެކުއެވެ. އިރާނަށް ދެވަނަ ބުރުން ފުރުސަތު ލިބެން އޮތް ހަމައެކަނި ގޮތަކީ ގްރޫޕް ސްޓޭޖް ފަހު މެޗުގައި ބޮސްނިޔާ އަތުން މޮޅުވެ އަދި އާޖެންޓީނާ އަތުން ނައިޖީރިޔާ ބަލިވެގެންނެވެ. އެނޫން ނަތީޖާއެއް ނުކުމެއްޖެ ނަމަ ދެވަނަ ބުރުން ޖާގަ ލިބޭނީ ނައިޖީރިޔާ އަށެވެ.