ގާނާއާ އެއްވަރުވެ ޖަރުމަނު އިތުރު އިންތިޒާރެއް ކުރަން ޖެހިއްޖެ

ވޯލްޑް ކަޕް ގްރޫޕް"ޖީ" ގައި ގާނާއާ ދެކޮޅަށް ރޭ ކުޅުނު މެޗް 2-2 އިން އެއްވަރު ވުމުން، ދެވަނަ ބުރުން ޖާގަ ކަށަވަރު ކުރުމަށް އިތުރު އިންތިޒާރެއް ކުރަން ޖެހިއްޖެއެވެ.

ވޯލްޑް ކަޕް ތިންފަހަރުކާމިޔާބު ކޮށްފައިވާ ޖަރުމަނުން ރޭ ގާނާގެ ގޯލު ހުޅުވާލީ 51 ވަނަ މިނެޓުގައި ޒުވާން ޕްލޭމޭކަރ މާރިއޯ ގޮޓްޒާ ކަކުލުން ކާމިޔާބު ކުރި ލަނޑަކުންނެވެ. އޭގެ ތިންމިނެޓް ފަހުން ގާނާއަށް އެއްވަރު ކޮށްދިނީ ރޭގެ މެޗުގައި މޮޅު ކުޅުމެއް ދެއްކިއަންދްރޭ އަޔްވެއެވެ. މިއީ އޭރިޔާގެ ބެރުން ނެގި ހުރަހެއް ބޮލުން ގޯލުގެ ކަނަށް ފޮނުވާލައިގެން ކާމިޔާބު ކުރި ލަނޑެކެވެ.

ޖަރުމަނު ސިއްސުވާލުމަށްފަހު ގާނާއިންލީޑް ނެގީ 63 ވަނަ މިނެޓުގައި ކެޕްޓަން އަސޮމޯހް ޖިޔާންގެ ލަނޑުންނެވެ. ޖިޔާންމިލަނޑު ޖެހީ ސޫލޭ މުންތާރީ ތަނަވަސްކޮށްދިން ފުރުސަތަކުންނެވެ. މިލަނޑާއެކު ޖިޔާން ވެގެން ގޮސްފައި ވަނީ އެފްރިކާއަށް ނިސްބަވާ ކުޅުންތެރިންގެ ތެރެއިން ވޯލްޑް ކަޕުގެ ތާރިހުގައި 5 ލަނޑު ޖެހި ދެވަނަ ކުޅުންތެރިޔާ އަށެވެ.

ލީޑް ނެގުމަށްފަހު ގާނާއިން ވަނީމެޗް ކޮންޓްރޯލްކޮށް ޖަރުމަނު ޕްރެޝަރަށް ވައްޓާލާފައެވެ. އަދި މިވަގުތު ކޮޅުގައި ލަނޑުޖަހާނެ ރަނގަޅު ދެފުރުސަތުވެސް ގާނާއަށް ލިބުނެވެ. މީގެ ތެރެއިން އެއްފުރުސަތު ޖަރުމަނުގެ ކީޕަރު މެނުއަލް ނޯޔާ ދިފާއު ކުރިއިރު އަނެއް ފުރުސަތު އަޔުވްގެ ބޮލުގައި ލައްވައި ނުލީއެވެ .

ޖަރުމަނު ބަލިވާން ދަނިކޮށް ސަލާމަތްކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ގޯލާ ރައްޓެހި ފޯވާޑް މިރްސްލާވް ކްލޯސާއެވެ. މިލަނޑާއެކު ވޯލްޑް ކަޕުގެ ތާރިހުގައި ކްލޯސާ ޖެހިލަނޑުގެ އަދަދު، ވޯލްޑް ކަޕުގެ ތާރިހުގައި 15 ލަނޑު ޖަހައިގެން ބްރެޒިލްގެ ރޮނާލްޑޯ ހަދާފައިވާ ރެކޯޑާ އެއްވަރުވީއެވެ.

މިމެޗުން ލިބުނު އެއްޕޮއިންޓާއެކު ޖަރުމަނު އޮތީ 4 ޕޮއިންޓާއި ފައިދާ 4 ލަނޑާއެކު ގްރޫޕުގެ އެއްވަނައި ގައެވެ. އެއްޕޮއިންޓާއެކު ގާނާ އޮތީ ގްރޫޕުގެ ތިންވަނައިގައެވެ. ދެވަނަބުރުން ޖާގަ ހޯދުމަށްޓަކައި ޖަރުމަނަށް މިހާރު ބޭނުންވަނީ އެންމެ ޕޮއިންޓެކެވެ.

މިގްރޫޕުގެ ދެވަނައިގައި 3 ޕޮއިންޓާއެކު އޮތް އެމެރިކާ އާއި ޕޮއިންޓެއް ނުލިބި ގްރޫޕުގެ ފުލުގައި އޮތްޕޯޗުގަލް މިރޭ ބައްދަލު ކުރާނެއެވެ. މިމެޗުން އެމެރިކާ މޮޅުވެއްޖެނަމަ ދެވަނަ ބުރުން އެގައުމަށް ފުރުސަތު ލިބި ޕޯޗުގަލް މުބާރާތުން ކަޓާނެއެވެ.