މެސީގެ ޖާދޫން އާޖެންޓީނާ ދެވަނަ ބުރުން ޖާގަ ހޯދައިފި

މެޗުގެ އިތުރު ވަގުތުގައި ކެޕްޓަން ލިއޮނަލް މެސީ އިރާން ކޮޅަށް ޖެހި ހިތްގައިމު ލަނޑު 1-0 އިން މޮޅުވެ އާޖެންޓީނާ ދެވަނަ ބުރުން މިރޭ ޖާގަ ހޯދައިފިއެވެ.

މެސީ މިފަހަރު އޭނާގެ ޖާދޫ ދައްކާލީ ލަނޑެއް ނުޖެހި ދެޓީމު އެއްވަރުވާން ދަނިކޮށް އޭރިޔާގެ ބޭރުން އިރާނުގެ ތިން ޑިފެންޑަރުން އޭނާ ކައިރީގައި ވިއްދާފައި ތިއްބައި ދެ ޑިފެންޑަރުން ކައިރިން ދެމިގަތުމަށްފަހު 25 ޔާޑު ދުރުން ފޮނުވާލި ހަމަލާ ގޯލުގެ އަރިމަތީ ކަނުގައި ތަތްކޮށްލައިގެންނެވެ.

މިއީ މިފަހަރުގެ ވޯލްޑް ކަޕުގައި މެސީ ކާމިޔާބު ދެވަނަ ލަނޑެވެ. ފުރަތަމަ މެޗުގައި 2-1 އިން ބޮސްނިޔާ އަތުން އާޖެންޓީނާ މޮޅުވިއިރު ދެވަނަ ލަނޑު ކާމިޔާބު ކުރީ މެސީއެވެ.

މިޑްފީލްޑަރު ހާވިޔާ މެޝަރާނޯ އާޖެންޓީނާ ގައުމީ ޓީމަށް ކުޅެދިން 100 ވަނަ މެޗް މޮޅަކުން އާޖެންޓީނާއަށް ނިންމާލެވުނީ އެންމެފަހު ވަގުތާހަމައަށްވެސް އިރާނުން ދައްކަމުންދިޔަ ވަރުގަދަ ދިފާއީ ކުޅުމުގެ ސަބަބުން ނޭވާ ހިފަހައްޓާލައިގެން ތިބެއެވެ. އިރާނުގެ ކުޅުންތެރިން ވަނީ ފުރަތަމަ ހާފް ގޯލު ދިފާއު ކުރުމަށް ހިތްވަރުގަދަ ކުޅުމެއް ދައްކާފައެވެ.

ފުރަތަމަ ހާފުގައި އާޖެންޓީނާއަށް އުފެއްދުނީ ނުރައްކާތެރި ދެހަމަލާއެވެ. މީގެ ތެރެއިން ސާޖިއޯ އަގުއޭރޯ ގޯލުގެ އަރިމަތީ ކަނަށް ފޮނުވާލި ހަމަލާ އާއި ގޮންޒާލޯ ހިގުއިން ތިރިތިރިން ފޮނުވާލަން މަސައްކަތް ކުރި ހަމަލާ އިރާނުގެ ކީޕަރު ހަގީގީ ވަނީ ދިފާއުކޮށްފައެވެ.ދެވަނަ ހާފުގައި ކައުންޓަ އެޓޭކުގައި އިރާނުން އުފެއްދި ނުރައްކާތެރި ތިން ހަމަލާއިން ގޯލެއް ކާމިޔާބު ނުކުރެވުނީ އާޖެންޓީނާގެ ކީޕަރު ސާޖިއޯ ރޮމެރޯގެ ހުށިޔާރު ކަމުންނެވެ.

މިމޮޅާއެކު ދެވަނަ ބުރުގެ ޖާގައެއް އާޖެންޓީނާއިން ކަށަވަރު ކުރީ 6 ޕޮއިންޓާއެކުއެވެ. އިރާނަށް ލިބިފައި ވަނީ 1 ޕޮއިންޓެވެ. ގްރޫޕް ސްޓޭޖް ފަހު މެޗުގައި އިރާން ނިކުންނާނީ ބޮސްނިޔާއާ ދެކޮޅަށެވެ. އާޖެންޓީނާ ނިކުންނާނީ ނައިޖީރިޔާއާ ދެކޮޅަށެވެ.