މިރޭ އެއްބަނޑު އެއްބަފާ ދެބެންގެ ކުރިމަތިލުމެއް

ވޯލްޑް ކަޕް ގްރޫޕް "ޖީ" ގައި މިރޭ ގާނާ އަތުން "ބޮނޑި" އެއް ލިބިދާނެތީ ކަންބޮޑުވާ ކަމަށް ޖަރުމަނުގެ ކޯޗް ޔޯކިމް ލޯބުނެފިއެވެ.

ލޯ ބުނީ ފުރަތަމަ މެޗުގައި 4-0 ގެ ބޮޑު ތަފާތަކުން ޕޯޗުގަލް އަތުން މޮޅުވެފައި ވުމުން ގާނާއާ ދެކޮޅަށް މިރޭ ކުޅޭމެޗް ކުޅުންތެރިންނަށް ފަރުވާ ކުޑަކޮށްލެވިދާނެތީ ބިރު ގަންނަކަމަށެވެ.

މިމެޗް އެންބޮޑަށް ފާހަގަ ކޮށްލެވެނީ އެއްބަނޑު އެއްބަފާ ދެބެއިންގެ ކުރިމަތިލުމެއްގެ ގޮތުގައެވެ. ޖަރުމަނުގެ ބޭބެ ޖެރޯމީ ބޯޓެންއަށް ހިންދެމިލާނެ ފުރުސަތެއް ނުދީ ކޮއްކޮ ޕްރިންސް ބޯޓެންގެ މަސައްކަތަކަށް މިރޭ ވާނީ ޖަރުމަނު އަތުން ފުރަތަމަ ފަހަރަށް ގާނާއަށް މޮޅެއްހޯދައި ދިނުމެވެ.

"އަހަރެމެންގެ އަޒުމަކީ އެންމެފަހު ވަގުތާއަށް ހިތްވަރު ކުރުން" ޕްރިންސް ބޯޓެން ބުންޏެވެ.

ދެޓީމުގެ ހާލަތު:

މިމެޗަށް ނުކުންނައިރު ޖަރުމަނުއޮތީ 3 ޕޮއިންޓާއި ފައިދާ 4 ލަނޑާއެކު ގްރޫޕުގެ އެއްވަނައިގައެވެ. ޕޮއިންޓެއްނުލިބި ގްރޫޕް ތިންވަނައިގައި ގާނާ އޮތީ ގްރޫޕް ސްޓޭޖް ފުރަތަމަ މެޗުގައި އެމެރިކާއަތުން 2-1 އިން ބަލިވެ ގެއްލުން 1 ލަނޑާއެކުއެވެ. މިރޭ ޖަރުމަނު އަތުން ބަލިވެއްޖެނަމަ ދެވަނަ ބުރުން ޖާގަ ހޯދުމުގެ އަމިއްލަ ބާރު ގާނާއަށް ގެއްލޭނެއެވެ.

މެޗް ހާއްސަވާ ކުޅުންތެރިޔާ: މިމެޗް އެންމެ ބޮޑަށް ހާއްސަވަނީ ޖަރުމަނުގެ ޖަޒީގައި 100 ވަނަ މެޗަށް ނުކުންނަ ޑިފެންޑަރު ޕީޓަރ މަޓަސެކާއަށެވެ.

ކުރީގެ ކުރިމަތިލުންތައް: މީގެކުރިން ޖަރުމަނާއި ގާނާ ބައްދަލުކޮށްފައި ވަނީ ދެފަހަރުއެވެ. ދެމެޗްވެސް ކާމިޔާބު ކޮށްފައިވަނީ ޖަރުމަނެވެ. މީގެ ތެރޭގައި އެންމެފަހުގެ ވޯލްޑް ކަޕް ގްރޫޕްސްޓޭޖުގައި ގާނާގެ މައްޗަށް 4-0 އިން ޖަރުމަނު ކުރި ހޯދި މެޗް ހިމެނެއެވެ. ދެމެޗުގައި ޖަރުމަނުން ގާނާ ކޮޅަށް 7 ލަނޑު ޖަހާފައިވާއިރު ގާނައަށް ޖެހިފައި ވަނީއެންމެ ލަނޑެކެވެ.

މެޗް ކުޅޭ ވަގުތު: ރާއްޖޭގަޑިން މިރޭ ދަންވަރު 0:00

ދަނޑު: އެސްޓާޑިއޯ ކަސްޓެލާއޯ(ސަޕޯޓަރުންގެ ޖާގަ: 60342 )

ސިޓީ: ފޯޓަލީޒާ 

ރެފްރީ: ސަންދްރޯ ރިއްކީ (ބްރެޒިލް) ، އެސިސްޓެންޓް ރެފްރީ: އެމާސަން ޑިކަވާލޯ (ބްރެޒިލް) ، އެސިސްޓެންޓްރެފްރީ: މާސެލޯ ވެން ގައްސެ، ހަތަރުވަނަ އޮފިޝަލް: ވިކްޓަރ ކަރިއްލޯ (ޕެރަގުއޭ)